Kua whakatau te kapa Waahine Maaori NRL All Stars ki runga o Waahi Paa hei timatanga i te wiki kia rite ai moo ngaa tukinga me te kapa Waahine Iwi Taketake noo Ahitereiria All Stars.
Ka whaanau a Mya Hill-Moana (Waikato) ki Raahui Pookeka, ootiraa ka taakaro hoki ia moo te karapuu Riiki o Taniwharau, kei roto ia i te kapa o ngaa Waahine Toa o Aotearoa koinei tana tau tuawhaa e taakaro ana ia mo te kapa waahine Maaori i teenei whakataetae iwi taketake.
“Ki a au i te waa i kake maatou i te marae, i tau ai te wairua i runga i te mea kei te uu maatou ki ngaa mahi moo te wiikene,” hei ai ki a Mya Hill-Moana.
“Koinei tooku waa tuatahi ka noho tawhiti au mai taku peepi. Ka uaua hoki teenei wiki mooku naa runga i te mea kua kore taku peepi ki tooku taha,” hei taa Mya anoo.
Ko Harata Butler (Ngaapuhi) teetehi atu i tupu ki Raahui Pookeka, i taakaro hoki ia moo Taniwharau, ootiraa e rua aana karapu NRL ko Cronulla Sutherland Sharks me North Queensland Cowboys, aa, e whaa hoki ngaa waa kua taakaro ia moo te Kapa Waahine Maaori nei.
“I too taatou nei taenga mai, ka taea te rongo i te wairua, ka taea te rongo i te aroha me kii. I tuuwhera ngaa rangi, i heke mai te ua. Ki a au nei, ki a taatou nei, he tohu teeraa i konei eetahi o ngaa kaumaatua noo konei,” hei ai ki a Harata Butler.
“Ia te tau, ia te tau i tuku mai te hoonore kia taakaro ki roto i teenei tiima, kia taakaro moo teenei kaupapa. Ka pakeke haere au me kii. Ka hoki mahara ki te tau rua mano tekau ma iwa i too taatou nei keemu tuatahi moo te kaupapa me kii te Maaori All Stars, ngaa waahine,” hei taana anoo.
“Ki a au nei he whaangai o Waahi Paa, he whaangai au. I au e kuraina ana ki Te Wharekura o Raakaumangamanga, e noho ana ki Raahui Pookeka. Koinei te marae, te whaanau, te hapuu e poipoi i a au ki roto i taku tuakiritanga me kii.”
