I tuuwhera te poukai o Te Papa o Rotu marae mo toona huritau kotahi rau tau, aa, i whakanuitia teenei kaupapa hirahira e Ngaati Maahanga, hei whakanui i ngaa tikanga tuku iho me tr kotahitanga o te iwi i raro i te maru o te Kiingitanga.
I timata te tangi o te peene me te taenga mai o te Arikinui, a Kuini Nga wai hono i te poo, he tohu te mana me te whakahirahiratanga o te kaupapa.
E ai ki teetehi mokopuna o te marae, a Te Kaweora Enoka-Barton, he rangi whakahirahira teenei moo Ngaati Maahanga.
“I roto i teenei o ngaa tau kua whakaritehia ngeetehi o ngaa tuuranga mahi kia pai ai te noho o te tuakana ki te teina, te rangatahi ki toona kaumaatua,
“Noo reira, ko eeraa tuuaahuatanga e kite nei e maatou i teenei tau ko te tuutakitahi o te tuakana me te teina ki ngaa kaumaatua.”
Hei taa Enoka-Barton, he tohu teenei rautau i te huringa o te tai, me te waa hoki hei waananga i ngaa kaupapa moo aapoopoo.
“Kaaore e kore he akoranga oo roto o te noho tahi ki ngaa kaumaatua, te noho ki oo raatou rekereke, me te mea hoki e kore pea taatou e kite i teenei rautau anoo, noo reira ko te hiahia kia tino kapo ake ngaa akoranga i teenei waa, e kookiri tonu ana ngaa kaumaatua i oo maatou taha.”
Ko teetehi o ngaa tino kaupapa o te raa, ko te whakarewatanga o te waka huia hou e te Arikinui, hei whakamahara ki te oranga o te Kiingi kua mene ki te poo, araa, a Kiingi Tuuheitia.
I puta mai ngaa mihi aroha mai i te kaikaranga, a Ani Willis, moo te Kiingi me toona hononga ki te marae.
“Rua tekau tau e ia e noho ana i konei i tana ingoa ne, i puta mai i teenei marae. Mai i too taatou tupuna a koro Whati. Mai raa anoo ki te waa i mate ai e ia. To maatou aroha ki a ia. ”
Ko te puutaketanga o teenei poukai, hei whakamahara ki te haerenga o Kiingi Te Rata ki taawaahi, aa, tae noa mai ki teenei raa. Kei te mau tono taua kaupapa hei pou herenga moo ngaa uri o Ngaati Maahanga.
Hei taa te heamana oo mua o te marae, a Milton Ngaruhe, he tangata rangimaarie.
“Ko Tuuheitia. Ko te paapaa o Maahanga, ko Tuuheitia. He tangata rangimaarie, he tangata huumaarie. Noo reira i whakaarotia raatou, aa, ka tika ko Tuuheitia te ingoa.”