E whakanui ana ngā tauira o Te Kura Reo o Raukawa i te rua ngahuru tau o te kura reo nei ki Papa o Te Aroha marae i Tokoroa.
“I te wā i whakatere ai te waka ko wai ka hua, ko wai ka tohu, ka pēhea rā te roa, engari me mihi ki a Ngāti Raukawa i tēnei wā. E rua tekau tau. Ia tau, ia tau e haere mai ana te motu ki te ako i te reo i konei, i ētahi atu marae anō hoki, engari ko tāku ki tēnei marae, nā te mea kua, kua tūwhera mai anō te whare ātaahua nei kia kite ai ia i te ao, tōna ātaahua. Nā reira me mihi,” hei tā Tā Tīmoti Kāretu.
Ko te kura reo tētehi o ngā rautaki whakarauora reo, ā, e kite mārika ana i te whanaketanga o te reo nā te kura reo nei.
“Ahakoa rā tērā, kei te kaha tonu te iwi, kei te kaha tonu te hunga e taetae tonu ana, taetae tonu mai ana ki ēnei tūmomo kaupapa i ēnei rā,” hei tā Charlie Tepana.
Ko te whāinga o te kura reo nei kia whakangūngū i ngā pūkenga reo Māori, ā, kia whāngahia i ngā akoranga ki tēnā, ki tēnā e hiakai ana ki te ako i te reo.
“He tohatoha i aku nei mōhiotanga, aku nei akoranga nō ngā kura reo ki tōku ake whānau, ki aku hoa i te mahi i tōku nei ao, ki ngā tangata puta noa i ngā kokonga o Aotearoa, kia kōrero, kia rangona i te reo.”
Heoi, ehakē i te mea he māmā te whakahaere i tētehi kura reo,” hei tā Arawarangi Nicholl.
Heoi, ehakē i te mea he māmā te whakahaere i ngā momo kura pēnei.
“He uaua te whakahaere kura pēnei. Ki a mātou, kua neke noa atu i te toru tekau tau, engari ko ngā iwi ka kaha tonu, me mihi, me mihi, āe,” hei tā Kāretu anō.
Ko te wawata nui kia haere tonu ngā kura reo hei ngā tau e heke mai nei.