E ono ngaa pukapuka hou kua whakarewa hei rauemi moo ngaa tamariki mokopuna.
Kua whai waahi e ono ngaa kaituhi ki te waihanga i ngaa pukapuka e pupuru i ngaa koorero o gaa taniwha o te awa o Waikato me te awa o Waipaa.
“Waimarie raatou i eenei koha, i eenei taonga naa te mea ko taku reanga, kaaore i tino whai waahi ki eenei koorero e paa ana ki ngaa taniwha o te kaainga nei,” hei taa Ngaakau-Aio Kihi.
I ahu mai te whakaaro kia waihanga i ngaa pukapuka nei, kia kaua e waiho maa ngeetehi atu te tuhi i ngaa koorero, aa, kia whakapakari hoki i te hunga e ngaakau nui ana ki ngaa mahi tuhi pukapuka.
“Te aahua nei kua whakatuuwherahia teetehi kuuaha, teetehi tatau e pai ai ngaa kaitito, ngaa kaituhi pukapuka kia kuhu atu ki teenei ao o te tuhi pukapuka,” hei taa Winara Levi.
Ka noho ngaa pukapuka hei rauemi moo ngaa tamariki mokopuna, kia pupuru raatou i ngaa koorero o te kaainga.
“He kaupapa aataahua teenei mooku ake naa te mea kaaore he maha o ngaa kaupapa, kaaore e aahei te rangatahi ki te whai waahi ki te hanga pukapuka, otiraa, moo oo maatou mokopuna, moo oo maatou tamariki eenei pukapuka,” hei taa Kihi anoo.
Aa, ko te wawata nui, kia moohio, kia maarama puu ngaa tamariki mokopuna ki ngaa koorero moo ngaa taniwha o oo raatou kaainga.
“Ko te whakakitenga o ngaa kaiwhakahaere o teenei kaupapa, kia moohio puu ngaa tamariki mokopuna o Tainui Waka ki ngaa taniwha o teenei rohe. Noo reira, aae ka noho teenei hei rauemi moo ngaa uri whakatupu,” hei taa Levi anoo.