Ko Te Haona Kaha teeraa kua roa e ngaro ana i te papa whakataetae nei.
“I tiimata maatou i te tau 2012, noo reira kua aahua tekau tau maatou e ngaro ana i te papa tuuwaewae o ngaa whakataetae aa rohe o Tainui Waka. Heoi, i tiimata ake i runga anoo i ngaa maataapono o te whaanau,” hei taa Raakai Whauwhau.
Ko te tuuaapapa o te kapa nei, ko ngaa maataapono o te whaanau, aa, kua noho teenei kapa hei whaanau tuarua moo ngeetehi o ngaa kaihaka.
“Kua whaanui ake taa maatou whaanau inaaianei. Kua nui ngaa Maaori e haere haere mai ana ki roto o Waikato. Koinei taa raatou kaainga inaaianei, noo reira kua aapiti mai hoki raatou ki Te Haona Kaha hei whaanau tuarua,” hei taa Whauwhau anoo.
Ehakee i te mea ko te whakataetae te whaainga matua moo teenei kapa. Ko te whaainga moo te kapa nei, kia tuu ngaatahi anoo hei whaanau.
“Ko te tuu ngaatahi hei whaanau. Ka rua, ko te whakapakari i te oranga o te whaanau, te whai i ngaa kaupapa, i ngaa tohutohu o too taatou Arikinui,” hei taa Te Wairere Ngaia.
E moohio, e maarama puumau hoki teenei ki too raatou tuakiritanga, aa, ka kawea teenei kapa i eeraa aahuatanga ki runga i te atamira.
“E moohio puu ana maatou ki too maatou Apakuratanga, ki too maatou Waikato-Maniapototanga, ki ngaa koorero tuku iho o too maatou paa, o oo maatou marae maha. Noo reira, ka kawea ngaua aahuatanga ki roto ki ngoo maatou mahi,” hei taa Ngaia anoo.
Ka tuu teenei kapa hei te rua tekau meneti paahi i te rua i te ahiahi (2:20pm) hei teenei Raahoroi ki ngaa whakataetae kapa haka aa rohe o Tainui Waka.