Ka hui tahi te hunga tautoko o te Pāti Kākāriki ki Rotorua, ki te whakarongo ki te Kaiārahi Takirua, ki a Marama Davidson, me tā rātou kaitono mō te Waiariki, ki a Tania Waikato.
Ka whai wāhi te tokorua nei ki te kōrero ki te marea e pā ana ki ngā kaupapa matua o te pāti, tae atu ki te nui o te utu o te kai me te whare, me te tiaki i te taiao.
“He pai ngā kōrero katoa o te pō nei. He maha ngā tāngata i haere mai ki te kite i a māua, ki te whakawhiti i ngā whakaaro e pā ana ki te ao tōrangapū, ki a au nei, ko te mea nui, ko te kite i te marea… he wā uaua tēnei mō te katoa, he nui ake ngā utu mō te kai, mō ngā whare, mō ngā mea katoa,” hei tā Tania Waikato.
“Ko te mahi o Te Pāti Kākāriki, ko te mahi mō ngā tāngata katoa nē. Ko ngā mea tinana, tino whakahirahira ki ahau nei ko te Tiriti, ko te taiao me ngā tāngata. Ko ērā mea e toru ngā kaupapa tino nui mō Te Pāti Kākāriki kia whakapiki ake i ngā wawata o te marea katoa,” hei tā Tania anō.
He kō atu i te rima tekau tāngata ka tae atu ki tētehi wharekai i Eat Street ki te hui o te pō pare ki te tūtaki ā-kanohi i a Tania rāua ko te Kaiārahi Takirua ki a Marama Davidson.
“Kia uru atu a Tania Waikato ki te Whare Pāremata, ko tērā te mea tuatahi, te kaupapa tuatahi o te Pāti Kākāriki ki whakamana i tōna mana, tōna reo, tōna karanga ki te ao, ki te marea, ki te tiakina a Papatūānuku, tiakina ngā mokopuna hoki. Nō reira, ko tērā taku tino take te tae mai ki konei ki te whakamana i a Tania Waikato mō Waiariki,” hei tā Marama.
“Ko te rapu tautoko ngā kaitautoko i te whakamana i te haerenga o Tania ki te whakamana i Te Pāti Kākāriki hoki, me te mana ki a rātou ngā tāngata katoa, kei a rātou te mana ki te whakawhitiwhiti kōrero e pā ana ki te pōti,” hei tāna anō.
“Pōtihia, tērā te mihi ki a koutou, pōtihia. Kia ora, koinā.”
Hei te pō Horoi te tuaiwa o Noema mōhio tātou katoa mēnā ka uru a Tania ki te whare Pāremata kāore rānei.