I tēnei pō, kua kī te whare tapere o Sir Howard Morrison i te hunga mātakitaki, kua hokona katoatia ngā tiketi mō te whakaari ‘Tērā Te Auahi’. He pō whakahirahira tēnei e whakamihi ana i te iwi o Tūhourangi i a rātou e whakamahara ana i te 140 tau mai i te hū o Tarawera.
Neke atu i te 200 ngā uri i tae atu ki te matakitaki i tēnei whakaaturanga motuhake, e ora tonu nei ngā kōrero o nehe, e puawai tonu ana te iwi ahakoa te mamae o mua.
E ai ki te kaiwhakahaere, a Matiu Hamuera, he koha nui tēnei mā te iwi whānui o Te Arawa.
“Kua whakaaetia a Tūhourangi mā mātou te hunga e whakaohooho i ēnei o ngā kōrero. Nō reira, nā mātou te whiwhi. Nā te iwi hoki te whiwhi,” te kī a Matiu.
He mahi nui, he mahi taumaha hoki tēnei mō ngā kaiwhakaari. E kī ana a Ngatairangirua Rio, he hātepe ako tēnei mahi mōna i a ia e ruku hōhonu ana ki roto i tana kiripuaki a Matarehua.
“I mua mai i tēnei whakaaturanga kāore au e mōhio i te taumahatanga o ngā kōrero. I te wā i āta ruku hōhonu ki ērā kōrero, he āhua wehi ahau ki ngā kōrero. Nō reira, e mōhio ana au he haepapa nui tā te kiripuaki i roto i ngā whakaaturanga,” te kī a Ngatairangirua.
Ko Teumairangi Webster-Tarei, he uri hoki nō Tūhourangi Ngāti Wāhiao, e kī ana he hātepe ako tēnei mahi mōna, i a ia e mahi ana i te taha o ngā kōrero o ōna tūpuna.
“Ko te whakamāramatanga o tōku kiripuaki he tama e whakamahi ana i ngā mahi o ngā kaiurungi, ngā kaimahi o Te Wairoa. Nō reira, e akoako tonu ana ahau,” te kī a Teumairangi.
Kei te haere tonu te whakaari i tēnei pō, he tohu e ora tonu ana ngā kōrero o nehe, e puawai tonu ana te iwi.