Kua tae mai te waka tauā o Te Arawa ki Te Kaitao o Rangipare, e tohu ana kua rite te papa pakanga mō Te Whakataetae Kapa Haka ā-rohe o Te Arawa. Ko tēnei hui nui ka kite ko wai ka tohu ki te whakakanohi i te waka nei ki Te Matatini 2027.
“Kua tau pai ai ngā whakaaro ko tēnei te hui o Te Arawa. Kua whakatinanahia tērā whakaaro i te taenga mai o te waka. Nō reira, kua tae mai Mai i Maketū ki Tongariro, me kī rā koira te kōrero a tā tāua nei waka,” te kī a Piki Thomas, kaiwhakahaere o Te Arawa Kapa Haka.
“Ko te mea nui kia eke pānuku ngā tīma toa o te takiwā nei. Engari, ko te mea whānui pea e pā ana ki te hapori nei, kua tae mai ngā kapa katoa, ka tū ngā reanga katoa ki runga ki te papa tūwaewae, kia puta ā mātou Te Arawatanga ā kapa haka nei, ā waiata nei, ā mōteatea nei,” hei tā Piki anō.
I tae atu anō te mema o te Komiti o Te Arawa Kapa Haka a Dan Vaka, ko ia hoki tētahi o ngā Kaiārahi o Te Hekenga a Rangi ki te tirotiro i ngā whakaritenga o te papa whakataetae.
“He rawe ngā whakaritenga. E mahi tonu ana ngā kaihanga ki te whakatika i te atamira me ngā tāwharau mō ngā koeke. Atu i tērā, āe he rawe, e hīkaka ana,” hei tā Dan.
“He māmā noa iho ki te tangata kia hoki tīkiti mō tētehi kaupapa Pākehā, ngā konohete, ka mutu, he nui te utu anō hoki. Nō reira, me uaua kē ka kite tātou i ngā kaupapa Māori pēnei i ngā whakataetae ā rohe mō te kapa haka te take,” hei tāna anō.
Ko Te Kaiamo Rogers-Smith, nō Te Pikikōtuku o Ngāti Rongomai, tētahi o ngā kaiārahi o te kapa whakataetae tuatahi ka eke ki te atamira hei te ata o te Rā Horoi. Ahakoa kāore tōna pāpā a Tukiterangi Curtis e tū ana, kei te reri te kapa, ka mutu hei nui āna mihi ki ōna mātua.
“Kua roa rāua e hakatahi ana. He āhua whā tekau tau rāua e hakatahi ana i Mātārae, i Te Pikikōtuku anō hoki. Nō reira i tēnei tau, kei te rongo ia i te wairua, kei te rongo ia i ngā kare ā roto, kei te rongo ia i te mahi uaua e mau nei ki ōna pokohiwi,” hei tā Te Kaiamo.
Ka mutu, he karanga tō Piki Thomas ki te iwi whānui kia tautoko i ngā kapa katoa: “Haramai ki te tautoko i te katoa, kaua ko te kotahi, ko tō mokopuna anake… Kia tū pai ai rātou i runga i te atamira i tēnei wiki whakamutunga. Nō reira, me kaha tātou ki te tiaki ki te tautoko i a rātou katoa.”