He tata ki te toru marama mai i te wā i wera te whare tapere matua o Mitai Māori Village. Heoi anō, e haere tonu ngã konohete hei whakangahau i ngā tūruhi.
“I ohorere katoa ahau me te ruku tonu atu ki te whakaaro, ka pēhea e tū tonu ai te kaupapa nei? Ko te waimarietanga nui, ko te korenga o te ngahere nei i wera,” hei tā te kaiwhakahaere o Mitai Māori Village, a Wetini Mitai-Ngatai,
“Koinei te wā. Koinei te wā kia whakahouhia. Akene pea, ko ngā tūpuna ērā e kī ana whakakorehia tērā ‘shack’. Whakatūhia he mea hou,” hei tāna anō.
“Ahakoa, he nui ngā mahi, kei konei tonu ngā tāngata hei whakatinana i ngā moemoeā.”
I te tuawhā o Noema i tērā tau ka wera ētahi o ngā whare me ngā whakairo ki te pā tonu nei.
“I tēnei wā e pukumahi ana, e toru ngā konohere ia te rā o te wiki. Nō reira, e koke whakamua ana te waka,” e ai ki te Kaiwhakahaere Konohete, a Watikena Haira.
“Ko tērā te mea pai i runga i te mōhio kātahi anō ka tanumia tō mātou whare tawhito. Nō reira, he maringa nui.”
Ko te tūmanako ka tū anō te whare tapere hou hei ngā marama e rua e haere ake nei.
Ka pāhotia ai te ataata ki runga nei i te 5 o Noema 2025.