Kua tū te rā whakanui o Mokotini ki te Mercury Arena i te rā nei, he kaupapa e whakahuihui ana i ngā Kōhanga Reo neke atu i te tekau mā whitu o te rohe o Tauranga Moana.
E whakaatu ana ngā tamariki me ngā mātua i ō rātou mahi, i ā rātou waiata, i te haka, i te poi hoki, e whakatairanga ana i te hiranga o te reo me te ahurea Māori i roto i ngā kōhanga reo o te rohe.
Ko te māmā o Te Ākau, a Te Inuwai Nicholson, e koa ana ki te kite i te nui o te tautoko a te whānau. “He rawe te kite i ngā tamariki, te whakanui i a rātou, ngā Kōhanga anō me te urunga mai o ngā whānau,” hei tā Te Inuwai Nicholson, tēteahi māmā o Te Kōhanga Reo o Te Ākau.
“Ka uru mai ngā whānau katoa ki te akiaki i ngā mokopuna, i ngā rangatira o āpōpō,” hei tā Te Inuwai anō. “E rua āku pēpi e haere ana ki te Kōhanga Reo o Te Ākau.”
Ko te kaiako matua o Te Kōhanga Reo o Te Ākau ki Pāpāmoa, ko Whaea Mina Haora, e kite ana i tēnei kaupapa hei huarahi e kitea whānuitia ai ngā hua o te Kōhanga Reo.
“Pēnei tōku āhua. Ko pēnei te akiaki i ō mātou tamariki kia pai te hanga o te taera kia kite whānuitia koinei te hua o te Kōhanga Reo,” hei tā Whaea Mina anō.
“Koinei te tino painga o tō mātou Kōhanga, ka pēnei mātou i ngā wā katoa,” hei tāna anō. “Koinei tō mātou tau tuarua engari kei roto i ngā tau tuarua kua panoni ngā kaimahi nō reira te nuinga o ā mātou kaimahi he kaimahi hou.”
He tata ki te whā rau te hunga ka tae atu ki te kaupapa, tamariki mai, mātua mai, ā, kaumātua mai.
E ai ki te kaiwhakahaere o Mokotini, a Veronica Edwards, he wāhi tēnei kia hui tahi ai ngā Kōhanga Reo ki te whakapakari i ngā hononga me ngā whanaungatanga.
“Inā piki me ngā heke kei te tū tonu tā mātou kaupapa. Ahakoa te huringa o te wā, ahakoa ngā pēhitanga kei runga i a mātou i ētahi taima,” te kī a Veronica.
“Nā tērā tūāhua nōna te whakapaipai i a rātou katoa. He rawe!” I akiaki hoki ia i te hunga e rapu ana i te Kōhanga Reo, “Haere mai ki te titiro. Inā kei te rapu Kōhanga koe, haere mai. Tuatahi haere mai ki te kōrero!”
Kei te ora tonu te kaupapa matua o ngā Kōhanga Reo o Tauranga Moana, e whakanui ana i te reo me te ahurea mō ngā whakatupuranga e heke mai nei.