Huihui ai te tini, te mano ki te poukai a Ngaati Te Wehi ki runga o Ookapu Marae, ki reira whakatūwherangia ai ngā whare e toru e Te Arikinui Kuini Nga wai hono i te po. E whakanui ana te marae i tana poukai i tīmatahia i te kotahi rau, rua tekau mā iwa tau ki muri.
Kua roa te wā e whakapau werawera ana a Ngaati Te Wehi kia tū tika ai ngā whare, ko tā te Heamana o Ookapu a Miki Apiti, “Ono tau mātou e mahi ana ngā mahi kia tū mana motuhake te marae nei nā ngā whare nei.”
Ko te mana o Taranaki ka tā i te kawa mō te whakatūwheratanga o ngā whare, hei whakapakari i te hononga ki te Kiingitanga.
Ko tā Wharehoka Wano nō Taranaki iwi, “Kua tina, kua whena, kua toka te hono o tātou o Taranaki maunga ki te kīngitanga, ki tō tātou ariki Nga wai hono i te po.”
I hoki anō ngā mahara ki te tono o mua a Kiingi Tuheitia: “E taku ariki, tekau tau ki muri i tono tō pāpā, a Kiingi Tuheitia kia taki ngā karakia, kia taki te poi, ngā ruruku ki runga i a Auau-ki-te-rangi. I tēnei rā, i runga i tō reo karanga, kua hoki mai ki runga o Ookapu kia taki te poi, ngā ruruku ki roto i ēnei whare e tū nei.”
I mihi atu a Rahui Papa, te Māngai o te Kiingitanga, i te taenga mai o te Arikinui, me te kī, “Ka nui te mīharo nā te mea kua ono tau e noho tārewa ana Te Punakai ki konei kia pai ai te whakatikatika i ngā whare… heoi anō kua tatū mai ki tēnei rā, kua tatū mai tō tātou ariki nui ki te whakapūmau.”
Ko ngā whare kua whakatūwherangia ko te wharenui ko Te Kotahitanga o Ngāti Te Wehi Te Tuarua, ko te whare kaumātua ko Aotea Whenua, me te whare kai hou ko Te Okiokinga o te Punakai.
Ko tā Miki Apiti anō, “Te tuatahi, kua tae mai rā te ariki nui ki te whakanui me te whakahōnore i ngā whare e toru… Koa ana te ngākau ki te kite atu i a koutou katoa kua tae mai ki runga i te whakatuwheratanga o tēnei marae, ngā whare e toru.”