Kua hoki mai a Te Arikinui Kuini Nga wai hono i te po i Ingarangi whai muri i āna hui ki te Whare Ariki o Piritanianui ki a Kīngi Tiare rāua ko Wheiao Wiremu, ā, i tae atu ia ki te Poukai tuatahi o Ngāti Pikiao ki Te Puna Whakareia marae ki te whakamōhio ki ōna iwi mō āna tūtakitaki haere i te ao. I haere ngātahi a Tukoroirangi Morgan, Heamana o Te Arataura, ki te taha o Te Kuini ki Uropi, ki reira tutaki ai ki te Whare Ariki o Windsor.
“E whakatutuki e ia ngaa moemoeaa o ngaa tuupuna kia whakakanohi ia taa maatou kaupapa o te Kiingitanga ki mua i ngaa mana nui,” hei tā Tukoroirangi.
Nā te Kiingitanga ēnei Whakaahua
Ka whakatakotohia e Te Arikinui ngā kōrero e pā ana ki ngā mahi kino a te kāwanatanga o Aotearoa ki te Tiriti o Waitangi ki mua i te karauna o Ingarangi
“Kia maarama katoa raaua i ngaa mahi kino a teenei kaawana kia taatou. Ko te turuki haere i ngaa ture. Ko te turuki haere i Te Tiriti o Waitangi. Eera momo koorero katoa, naanaa i whakakanohi ki mua i ngaa mana nui o te karauna o Ingarangi. He mea nui teera,” hei tāna anō.
Ka tū te hui a Ngāti Pikiao ki Te Puna Whakareia marae, te kāinga o Ngāti Te Rangiunuora, i Rotoiti. I kōrero a Jade Kameta o Ngāti Te Rangiunuora mō te manaaki o te marae ki a Te Arikinui.
“Ko tō mātou hiahia kia manaaki ai tātou. Kia rongo ai a tō tātou Kuini i te aroha me te manaaki o tēnei marae me ōna hononga me ōna whakapapa o tēnei marae ki a ia,” hei tā Jade.
Ko te kaupapa o te Poukai i aro ki te wai me te toitūtanga o ngā roto o Ngāti Pikiao.
“Mātou o konei ko te wai ko to mātou tuakiritanga. He whakapapa mai rā anō nō taaukiuki te whakapapa kei roto i te wai,” hei tāna.
Ka haere mai a Te Arikinui ki te marae o Te Puna Whakareia o Rākēiao mai i Buckingham Palace. Koinei te Poukai tuatahi mō Te Arikinui i muri i tana haerenga ki Ingarangi.