E piki haere ana a Dr. Reuben Tuwhakahekeao Collier (Te Arawa, Ngāti Porou, Ngāti Rereahu, Ngāti Maniapoto) i te Rārangi Whakahōnore o te rā whānau o te Kīngi 2026, mai i te Tohu Mema (MNZM) ki te Tohu Hoa (CNZM) o Te Kāhui Tohu Hiranga o Aotearoa, mō āna mahi mō te iwi Māori me te ao mātauranga.
E kī ana a Dr. Collier he tohu tēnei e whakatau ana i te aronga ki ngā taonga o te iwi Māori, ā, nā tēnei whakamānawa kua heke ōna roimata mō ngā mātua tīpuna.
“Kia mōhio tonu he tohu nui e aro atu ana ki ngā taonga nui o te iwi Māori. Ki te reo, ki ngā tikanga me ōna ritenga katoa, nā konā kua heke aku roimata kia kui mā kia koro mā nā rātou nei e whakaae ana,” hei tā Dr. Collier.
He nui āna mahi ki te ao pāpāho Māori, ki te rangahau, me te tiaki i te reo Māori me ōna tikanga. Mai i te hanga hōtaka i tana kamupene o Maui Productions ki te tohutohu i te Poari o Whakaata Māori, kua upoko pakarū ia ki te hāpai i te reo me ōna tikanga.
“Mō ngā tau tata nei. Rua tekau, tekau mā whitu. Ka tau mai ko te hōnore a te Kuini, te MNZM, nā Kuini Irihapeti. Nō tēnei tau nei 2026, ka tau mai ko te hōnore a tana tamaiti a Kīngi Tiāre. Hei aha? Hei tohu ki te tīkiti o te mana Māori,” hei tāna.
Ka toa i a ia i te Mētara Pou Aronui mai i te Royal Society Te Apārangi mō āna mahi rangahau iwi taketake i tērā tau, ā, he Pouako Mātāmua hoki ia ki Te Whare Wānanga o Awanuiārangi.
“Ka hoki ake i ngā whakaaro o tā Hemi Henare e kī nei ko te reo te mauri o te mana Māori. Kia tatū mai ki tēnei wā nei o Tā Hirini Moko Mead, e kī nei ko te Whare Wānanga Māori he rite tōna mana te Whare Wānanga a te Pākehā,” hei tā Dr. Collier.
“Nō tātou te hōnore nui. Te takutū haere i waenga i tō tātou iwi Māori. Ngā hapū, ngā marae, tiakina ngā kai kōrero. Tiakina ngā kōrero. Kia kaua tātou e wareware ki te wāriu ki te tiketike ki te mana o runga i ngā taonga nei ā papaaho, ā mātauranga ka puta ki te wheiao ki te ao Mārama,” hei tāna anō.
Ānei te tuihono ki te katoa o te rārangi whakahōnore:
https://www.dpmc.govt.nz/publications/kings-birthday-honours-list-2026#onzm