Kua hinga te tōtara haemata nō roto mai o te rohe o Ngāti Raukawa ki te Tonga, a Whatarangi Winiata.
Nō te ahiahi o Wenerei rere atu ai tōna wairua ki ngā ninihi o raurangi,ki te mūnga o te tini, ki tōna rahi, ki tāna makau a Francie Winiata,i a ia i te pūāhurutanga o tōna whānau.
Kua rongonui ia mō tāna whakarauora i te reo Māori ki te au o te tonga, ki te roherohenga o Ngāti Raukawa, mai anō i te tau 1975. He mea kite e ia te korenga o te kōrerotia o te reo Māori ki waenga nui i te reanga o raro i te 30 tau. Nā wai, nā wai ka amohia ake e ia te kaupapa o Whakatipuranga Rua Mano.
Mā roto i taua kaupapa ka hua mai te wānanga Māori tuatahi o Aotearoa, Te Wānanga o Raukawa. Ko tō Whatarantegi tōmina i taua wā, mā te whakatū i tēnei wānanga, ko te tō mai i ngā uri ki ō rātou nā marae me tō rātou reo Māori anō hoki. Waihoki, kia angitū ngā ākonga i te ao tūroa nei mā te hao ake i ngā mātauranga ō tuauki, ō nuinui mā, ō roroa mā.
Nō te tau kua hori eke ai te kaupapa o Whakatipuranga Rua Mano ki tōna 50 tau, me te aha kua kite, kua rongo hoki i te hua o tāna whakatangetange riaka kia whakarauora i te reo Māori me te mōhio ia kua reo rua te tāone o Ōtaki, te manawataki o te kaupapa o Whakatipuranga Rua Mano.
Nō te tau 2018 tohua a Winiata ki te tohu nā te Taura Whiri i te Reo Māori “Lifetime Achievement”, ā, i te tau 2022 whakahōnoretia anō ia e Ngā Kaihautū o ngā Iwi ki te tohu o Te Whare Pūkenga. Ko ia hoki te Māori tuarua i puta te ihu i te tohu paetahi tauhokohoko ki Te Whare Wānanga o Wikitoria. Ko ia hoki te perehetini tuatahi mō Te Pāti Māori, i te wā o Kahurangi Tariana Turia rāua ko Tā Pita Sharples.