Kua poowhiritia Te Whare Waananga o Waikato i ngaa tini tauira hou i te raa nei.
“I teenei waa e hiikaka ana, e hiamo ana ahau ki te tiimata i ngaa mahi inu pia, ngaa mahi inu waipiro. Noo reira, koia te ia matua o teenei wiki o te ‘O Week’. Noo reira koinaa taaku e rongo nei, ko te hiamo ki te whakahoahoa, ki te whakawhanaunga ki ngaa tini hoa kei waenganui i a taatou,” hei taa Te Kanawa Wilson.
Ko Te Kanawa Wilson teetehi o ngaa tini manomano tauira hou kua tau ki Te Whare Waananga o Waikato. Noo ngaa wiki tata nei i whakawhiwhia e Wilson i ngaa karahipi e rua moo Te Reo Maaori me Te Reo Rangatira. He tohu teeraa moo toona ekenga ki te tihi o angitu i roto i aana mahi o te kura tuarua, aa, maa eenei karahipi e aawhina, e taunaki hoki i a ia ruku tootika ana ki ngaa mahi Whare Waananga.
“Mooku ake, he taunakitanga nui teenei mooku, e taaea ai e au ngaa taputapu, ngaa mahi aa te mahi. Noo reira he aawhina nui teeraa te whai i ngaa moni e taaea ai e au te tiki i teetahi rorohiko hou pea, te tae atu ki ngaa hooro ki te utu i ngaa moni,” hei taa Wilson anoo.
Kei te hiikaka hoki teetehi o ngaa maangai o Maaori ki Waikato, a Naianga Tapiata naa te tokomaha o ngaa tauira hou kua whakaeke ki runga i a Ko Te Tangata i te raa nei.
“Ka tika kei te taumata o angitu te hiranga o teenei kaupapa. Kei te moohio, koinei te whakaekenga tuatahi maa eetehi o eenei tauira ki runga ki a maatou,” hei taa Tapiata.
Ko te wiki tuatahi noa iho teenei moo ngaa tauira hou, e kiia nei ko ‘O Week’, aa, i teenei wiki ka whai waahi ngaa tauira ki te ako i te whakatakotoranga me ngaa whakahaere o te Whare Waananga nei.
“Ko aku kupu akiaki ki ngaa tauira kia haere ki te karaihe, kia haere ki ngaa kaupapa maha kei konei kei Te Whare Waananga o Waikato,” hei taa Tapiata anoo.