Kaore a Peeni Henare i te whai i te tūru Māori o Tāmaki Makaurau me tētehi o ngā turanga ki te rārangi mō Reipa hei tēnei kōwhiringa pōti.
“Kua roa rawa te Māori e mea atu ana, ka pū te rūha ka hao te rangatahi, i tēnei wā tonu kua tutukihia te 12 tau ki roto te whare pāremata. Kua kake ahau ki ngā turanga nui o te Minitatanga,” hei ai ki a Peeni Henare o Reipa.
“Mehemea ka ngana ahau ki te kowhiringa pooti hei te mutunga o tenei tau, ki te kore koe e ngana marika nei, e hoa ka hinga koe. I heke tōku whanaunga tōku tuakana a Adrian ki roto i ngā wiki tata nei, ā kua kite atu ahau e hoa, ko ahau te mea e toe ana no reira koina pea e whakaaro ake ana kua tae te wā,” hei tāna anō.
Tumeke ana ngā rangatira ā-Iwi ki te pānui e heke ana a Henare i te Rōpū Reipa
“Kātahi anō ahau ka rongo i ēnei kōrero, he rongo tino kino rawa atu ki a au i te mea i te mutunga iho, he Ngāti Hine ahau, he Ngāti Hine a Peeni Henare me taku mahara i ngā kupu a tōna pāpā, me haere ia i roto i te whare pāremata ki te kōkiri, ki te whakakō atu i ngā kaupapa, ehara mō Ngāti Hine, engari mō te iwi Māori,” hei tā Pita Tipene o Ngāti Hine.
“Māku e whakaaro, me kōrero ahau ki a Ngāti Hine i te tuatahi, me kōrero anō hoki ki ngā iwi o Te Tai Tokerau, ngā hapū o Te Tai Tokerau. Nō reira, ka puta tētahi kōrero e mārama ana ki te motu, ki te Kāwanatanga, arā, ki te pāti Reipa,” hei tā Pita anō.
Nō te tau 2014 a Peeni tae atu ai ki te Whare Pāremata, nā he tere rawa tana eke ki ngā turanga minita pērā mō Whānau Ora. Ko ia tētahi e ārahi ana i te rautaki Māori o te Rōpū Reipa.
“E tūmeke katoa ana i te rongo kua kore a Peeni e tū ki runga anō i te tūranga whakataetae atu ki roto o Tāmaki Makaurau,” e ai ki a Tukoroirangi Morgan o Waikato Tainui.
“E mihi ana ki a ia mō te hautū i ngā kaupapa Māori i te wā i a ia te minita. Engari, kua kore nei tātou e rongo, e kite nei i a ia i roto anō i te whare pāremata. Ka aroha hoki,” a ai anō ki a Tukoroirangi.
“He tino ‘bro’ ki ahau,” hei tā te Kaiārahi Takirua o Ngā Kākāriki a Marama Davidson.
“I tuatahi, ko taku tino mihi aroha ki a ia, ki tana whānau, hapū, iwi hoki. He tino ‘bro’ ki ahau mō ngā wā katoa. I tū kotahi māua ki Tāmaki Makaurau i ngā tau kua heke, i ngā tau kua pāhure. Nō reira, he tino kaha tēnā kaitōrangapū a Peeni,” hei tāna.
Kaore anō a Peeni me Te Rōpū Reipa i te whakatau i te rā ka heke mai i te Pāti.
“Ā, i tēnei wā ka whakaaro ake ki ngā take o te ao Māori, ki ōku ake o Te Tai Tokerau, ki tōku whānau, ki ōku rahi o Ngāpuhi he maha ngā kaupapa e hiahia ana te iwi kia tōia mai anō hoki ki roto o Ngāpuhi,” hei tā Peeni anō.
