Kua tau te hā o te mātauranga ā-iwi ki Rotorua i tēnei wiki mō te Hui-ā-Motu mō Ngā Kura ā Iwi o Aotearoa, e kīa ana ko Te Pūtahi Nui 2026.
He hui tēnei e whakakotahi ana i te tini me te mano ki te Rotorua Energy Event Centre ki te wānanga i te anamata o ā tātou tamariki i raro i te korowai o Ngā Kura ā Iwi o Aotearoa.
I te puāwaitanga o tēnei kaupapa, kua kake te taupori o te kaupapa nei, ā, kua eke ki te 53 ngā kura puta noa i te motu kua uru mai hei kura ā-iwi. He tohu nui tēnei mō te kaha o te tupu o te mātauranga e whai mana ai te iwi me ōna tikanga.
Hei tā te Heamana o Ngā Kura ā Iwi o Aotearoa, a Watson Ohia, he wā hīkaka tēnei i te piringa mai o ētahi kura hōu. “Kua piri mai ētehi atu kura ki runga i ngā tāwharautanga o ngā kura ā iwi, a, Ngāti Pikiao – ko Te Kura o Whangamarino, tae atu ki te Tairāwhiti, Te Kura o Waikirikiri, heke iho ki te whārua o Ruatāhuna. Nō reira, e hīkaka ana kua piri mai ērā kura e toru,” hei tā Watson.
Ko tētehi o aua kura hōu ko Te Kura o Whangamarino nō Ngāti Pikiao. Ki tā tō rātou Tumuaki, ki a Rehua Mihaka, he huringa nui tēnei mō tō rātou kura e hoki ai te mana whakahaere ki te iwi. “Kua roa nei mātou e noho ana hei kura auraki, engari ināianei he kura ā iwi. Kua whai mana ai te iwi,” hei tā Rehua.
“I tērā wā e whakaarohia tō mātou tumuaki he kura ā iwi mātou. Engari mea atu au ki a ia ‘Kao, ehara mātou te kura ā iwi.’ Heoi, e whai ai te huarahi nā te huarahi anō mātou i tohu kia uru atu tēnei kaupapa, ngā kura ā iwi,” hei tāna anō. “Koia rā kei reira te wero, mā mātou Te Kura o Whangamarino kia wero atu ērā kōrero ki ō tātou tamariki mokopuna kia ea ai te kōrero kia rātou. Māku te kauae tapu a Kawatapuarangi e kawe.”
Neke atu i te kotahi mano ngā tāngata kua tae mai ki tēnei huihuinga, he whakaaturanga ora tēnei mō te kōrero “E piki Aorangi mā wai taku kauwae e tō ki uta!” “He wā tōna ka tūwhera anō te kuaha ki ērā atu o ngā whānau o ngā kura e hiahia ana te kuhu mai,” hei tā Watson anō.
E tū tonu ana te hui ki Rotorua hei whakapakari i te ū o ngā kura ki te reo Māori me ngā tūāpapa o te iwi mā te ao Mātauranga Māori.