Kua hoki mai te taonga o Ngāti Waiora, Ngāti Rahurahu, ōtirā o Ngāti Maniapoto, a Raymond Kaiki, ki tōna ūkaipō ki te marae Mōkau Kohunui i Piopio i te rā nei.
He tangata i whāngaihia ki te reo me ngā tikanga mai i tōna tamarikitanga, ā, he pou whirinaki nō ōna hapū me tōna iwi.
E hoki ana ngā mahara o Himona Muraahi kaumātua o Ngāti Maniapoto ki te tere o Raymond ki te ako i te reo rangatira nā wai rā ka matatau ia. Hei tā Koro Himona ka whānau mai a Raymond i muri tata i te whare tonu o Tama Tāne ki runga i te marae nei, ā, ka poipoi tōna aroha ki te Reo me ōna tikanga ki kōnei tonu.
E poho kererū pai ana a Koro Himona ki ngā mahi i tutuki i tana iramutu, ōtirā ka hoki ōna mahara ki te wā ka whakatūria e Raymond i tētahi rōpū Kapa haka e kīa ana ko Te Rōpū Aroha ki te Whakakotahi i ngā whānau me ngā hapū o kōnei.
Ko tōna mana i roto i tōna hapū i ārahi i te tokomaha, ā, he tino taonga tēnei kua hoki ki te rārangi o ngā tūpuna he ai ki te Kaikaranga o Mōkau Kohunui a Ripeka Price o Ngāti Waiora.
“E waimarie mātou nana hei arahi mātou. Ko tērā mea katoa nē, nā te mea maua ko Raymond hei arahi tētahi kaupapa wānanga i tērā wikēne ahua āwangawanga nā te mea kāore whakautu tāku waea pūkoro atu ki a ia,” hei tā Ripeka anō.
E whakaaro nui ana a Ripeka me tōna hapū ki te poipoi i ngā reanga e whai mai ana ki te whai i ngā tapuwae o Raymond.
“Ko te tumanako ngā tamariki nohinohi nē, tumanako tēnā, inaianei me whakaarohia, me wānangahia mātou ko wai hei whakamana tōnā mahi,” hei tāna anō.
Te aroha o Te Kāhui Maunga me te Ao Haka
Kua noho pōhara te ao Kapa Haka, otirā te rohe o Te Kāhui Maunga, i te matenga o tēnei tuahangata. Ko te aroha me te mana o Papa Raymond i pā atu ki ngā kapa maha, ā, ka maharatia tonutia tōna ngākau mahaki. I kī a Tamzyn Pue te māngai mō Te Kāhui Maunga ki Te Matatini mō tōna ahua i a ia e tūtaki ana i te ao.
“He tupua a Papa Ray, he tangata ngākau whakaiti i pupurū i a ia tēnei taonga ko te whakaiti he ngakau mahaki ōna,” hei tā Tamzyn. “Hāunga i ōna pukenga titonga waiata, whakaako i ngā ahuatanga o te ao Kapa Haka, tōna reo Māori me ōna tikanga i kapa poipoi a ia i aua taonga ki roto i ngā kapa katoa o Te Kāhui Maunga.”
I whakapuaki a Clive Tongaawhikau tētehi o ngā Kaiārahi o Te Kapa Haka o Tūtū Ka’ika i te taumaha o tēnei rironga ki a ia ki tōna whānau me tōna kapa haka hoki.
“He nui ngā kupu kei roto i tāku hinengaro i tēnei wā, e wiwi, wawa, i tatari mātou mō Raymond, kei a ia te karanga, kei a ia te mana, nou te mana mō mātou i tēnei rangi,” hei tā Clive.
I te mutunga, i whakanui a Te Taepa Kameta tētehi o ngā Kairangi o Te Kāhui Maunga i tōna hūmarietanga me te pānga hōhonu ki ngā iwi katoa.
“Ko te tohu tēnei o te hūmarietanga o te tangata, kua riro i a mātou, i a tātou i roto i ngā tuahuatanga o te wā, e pohara ana ngā iwi katoa o Tainui waka, o Aotea waka o Te Kāhui Maunga huri noa ki tēnei tangata, ki tēnei tuahangata,” hei tā Te Taepa.
“Koia te tangata nei me tana tino hiahia ki te hiki te kounga o ngā ahuatanga katoa o te whare karioi, o te whare haka i roto i a mātou o Te Kāhui Maunga, akene pea kei tua rā nō ōna whakaaro, te kounga ōna whakaaro e whaiwhai tonu ana te rohe i ōnā mahinga”.