Ko Tereomoana Haehae nō Te Kura Māori o Te Kōutu te toa whakāihu waka o Pei Te Hurinui (te wahanga reo Māori mō ngā tuakana).
Ka whakakanohi tēnei uri tekau mā whitu ōna tau o Ngāti Rangiwewehi me Tūhourangi Ngāti Wāhiao i a Te Arawa ki te Whakataetae ā-Motu hei te Hepetema.
“Kua mōhiotia whānuitia e Te Arawa ki te whakahīhī. Nō reirā e whakahīhī pai ana au ki te whiwhi i tēnei tūranga,” hei tā Tereomoana.
“Ko te nuinga o aku hoa kāore i te hiahia tū nā te mea he whakamā. Ehara ahau i te mea he tangata whakamā. Nō reirā ko tōku noa kia kaua e wete. Kia tū pakari, kia tū māia hei raukura mō tōna iwi,” hei tāna anō.
Ka tū te whakataetae ā-rohe o Ngā Manu Kōrero mō Te Arawa ki Tangata Rua marae, kei te papa o Te Pūkenga Toi Ohomai, mō ngā kura tuarua o Te Arawa.
Toa mō Pei Te Hurinui: Tereomoana Haehae, Te Kura o Te Koutu
Toa mō Te Korimako: Kaea Jordan, Te Kura Kaupapa Māori o Ruamata.
Ka puta te ihu o Kaea Jordan o TKKM o Ruamata ki te kapo ake i Te Korimako (te wāhanga reo Ingārihi mō ngā tuakana).
“Kia titiro au ki te torowhi nei, kua toa tō mātou nei kura mō e toru ngā tau nāianei. So, he whāinga nui tēnei mō tōku kura,” hei tā Kaea.
“Ū ki ngā mahi. Kārekau he rautaki anō. He ū ki ngā mahi, he noho humārie anō hoki he tū hei kanohi mō tōku kura, ara TKKM o Ruamata,” hei tāna anō.
Toa mō Te Rāwhiti Ihaka: Merehinewhakaangi Ihakara, Te Kura Kaupapa Māori o Ruamata.
Toa mō Turi Kara Winner: Aura Corbett, Te Kura o Te Koutu.
Nā te wikitoria o Merehinewhakaangi Ihakara i te wāhanga a Te Rāwhiti Ihaka, rāua ko Aura Corbett i te wāhanga Tā Turi Kara, ka rere rāua hei māngai mō Te Arawa ki ngā wāhanga kōrero ā-teina.
I tana whaikōrero, i tohu a Merehinewhakaangi i te hiranga o te mahi kotahi mō te reo, e kī ana, “Kia tū kotahi ki te whakamana i te Reo Māori ki te ao.”
Mō Aura Corbett, ko tana tūnga ki runga i te atamira he tohu tūmanako mō tōna kura. “He Pou mō tōku nei kura nā te mea he nuinga o te wā kāore mātou e tino haere ki ngā Whakataetae ā-motu o te manu kōrero.” I kī anō ia, i te wāhanga o te hāneanea o te tū, “Ko Tēnā Āhuatanga kei roto i a koe anō hoki.”
He mea whakahōnore te kite i ēnei kōkā rangatahi e Tū rangatira ana, e kawe ana i te reo me te mana o Te Arawa Waka ki te whakataetae ā-motu ka tū ki Te Tai Tokerau hei te Hepetema.