I tēnei rā, i te whare hokohoko Mōro o Rotorua, i tau mai te kaiārahi takirua o Te Pāti Māori, a Rawiri Waititi, ki te tuku i tāna pōti i waenga i te tini o te tangata e whakaputa ana ki te pōti moata. I haere tahi ia me ōna kaitautoko me ōna kaitaunaki o te kaupapa o te ‘Hīkoi ki te Pōti.’
I tukuna e ia tētahi karanga kaha ki te whānau kia puta ki te tautoko i tēnei kaupapa.
“Ngā mea kei te kāinga tonu e taumaha ana ngā waewae, kāore e tino rata atu ki te Kāwanatanga kaua e waewae taumaha, e puta koutou i wō koutou kāinga,” hei tā Rawiri.
“Hara mai ki te pōti, māmā noa te mahi ki te tuku atu i tō reo ki ngā mahi nei, ki te kore, ka waiho tonu mā tēnei kāwanatanga, tēnei ngāngara upoko tokotoru, te kāwana i a tātou,” hei tāna anō.
E piki haere ana ngā pōti moata i tēnei tau, nui atu i te kotahi rau rima tekau mano ngā pōti ka nui ake i tērā pōtitanga, ā, ko Rotorua tētahi e para ana i te huarahi mō te tokomaha o ngāi Māori kua pōti moata.