E koa ana te Tarahiti o Ngā Moana o Te Arawa ki te mahere tautiaki i te moana o Ōkāreka i tēnei raumati i te tini mano manuhiri ka tae mai ki te moana nei.
“Ko tēnei raumati i tū mai nei te wā hararei me te aha, kāre e kore ka tōia mai te tini mano o ngā waka ki konei, nā reira, me mihi ka tika au ki te hapori Okāreka nei, i me kī, i whakaaemi pūtea, i rapu tangata kia noho ki konei hei ārai atu i te hunga ka tae poka noa nei,” e ai ki tētehi mema o Te Tarahiti o Ngā Moana o Te Arawa, a Rangitihi Pene.
Hei tāna, “ki te kore e ārai atu ka uru mai ngā kāhira, ka hīkoura o tāwāhi, anā me te aha ka mau roa mō ake tonu atu.”
Ā ko ngā waka kua whakamahia ki runga i ngā wai o Waikato me Taranaki e tika ana kia hōroia i mua i te terenga ki runga o Ōkāreka.
Ka hui tahi te tarahiti me āna hoa hapori i te mutunga o tērā tau ki te whakaae ki tētehi mahere tiaki i te moana.
Kua whakaae ngā rōpū katoa ki te aroturuki i ngā wāpu poti e karapotia ana e te moana o Ōkāreka mā ngā kaimahi o te tarahiti, ngā mema o ngā hapū me ngā kaituao o te hapori pēnei i a LOCA Lake Ōkāreka Community Association e whakamārama ana i ngā mōreareatanga ki te tae mai te tuangi kōura.
“Ka taea i konei i Ōkāreka, engari ko te āwangawanga te taea i ētahi atu o ngā roto, pērā i a Rotorua nui a Kahumatomoe, te nui o ngā tomokanga i rotoiti hoki, i Tarawera,” hei tā Pene anō.
Ki te whai hua te mahere tiaki i te moana nei ka kawea e te tarahiti i te kaupapa nei ki mua i te aroaro o ngā hapū, ngā iwi me te hapori ki te moana o Tarawera.
Kei te pae tata mo te tarahiti ki te akiaki i te kawanatanga ki te tautoko i ō rātou kaupapa haumaru koiora o ngā moana katoa o Te Arawa.