E hoki ana te kapa haka o Te Paringa Tai ki Matakana me Rangiwaea ki te Whakataetae Kapa Haka ā-rohe o Mataatua mo te wā tuatoru.
“Te Paringa Tai he kapa haka no te kāinga nei, e noho nei hei kāinga haka mō ngā uri o tēnei kāinga ēnei motutere o Matakana, Rangiwaea, Te Motuhoe – e rima ngā hapū o konei o Ngāi Te Rangi ko Ngāi Tūwhiwhia, ko Ngāti Tauaiti, ko Tamawhariua, ko Te Whānau a Tauwhao, ko Te Ngare,” hei tā te Manukura Tane a Julian Rolleston.
“He waka tēnei hei whakapakari i te reo, hei whakapakari i ngā tikanga, he wāhi tēnei ki te ako i ngā kōrero o te kāinga, ka mutu, ko tētahi āhuatanga tino nui he huarahi tēnei e hoki mai ai ngā uri ki te kāinga,” hei tā Julian anō.
Mō tētahi o ngā kaihaka, mō Meg Rolleston, e 20 noa iho tana pakeke, i tupu ake ia ki Kirikiriroa, ā, he mea nui ki a ia te hoki mai ki te moutere ki te tū mō tōna kapa haka.
“He pai mōku kia whakatuhonohonotia ki a taku whānau, mā te hoki mai ki roto o tēnei kapa, waihoki te waiata tahi i ngā waiata e hānga pū ana ki tāku nei whakapapa,” hei tā Meg.
“Ko tētahi o ōku tino kōrero kua puta ake, ko tētahi o o tātou waiata e hāngai ana ki tā tātou tupuna whaea ko Tauwhao tōna ingoa uri o te moutere o Tuhua nō reira mōku ake he tino rawe ki te ākona mōna, he wahine mokemoke nō Tuhua,” hei tāna anō.
Ko Ripeka Murray, te Manukura Wahine o te kapa nei, he nui kē atu te kaupapa o te tū i te mahi kapa haka anake. “Kia manawaroa e te whānau me te mōhio ehara i te mea kei te mahi i te kapa haka noa iho, kei te kawe i ngā kōrero, i ngā hītori o te kāinga, ngā tupuna, rātou mā kua wheturangihia ehara i te mea ko te kapa haka anake,” hei tā Ripeka.
“Kia kaha tonu ahakoa koinei te terenga tuatoru o te kapa nei, kei te pakari haere ngā pukenga kapa haka, me te mōhio, te nuinga o ngā kaihaka he tuatahi i roto i ngā mahi kapa haka, nō reira, kia manawaroa, kia kaha tonu.”
Kua whakatauria koinei te kapa whakataetae whakamutunga ka tū ki te atamira ki Whakatāne hei te 6:05pm ā te Hatarei 28 o Pepuere.