I tūtū te puehu o te mātauranga i te Hōtera Sudima i Rotorua, i te huihuinga o ngā kaiako o ngā Kura ā Iwi o Aotearoa mō te kaupapa whakahirahara, a Te Pae Tōmina. Ko tēnei kaupapa he rākau rangatira hei tautoko, hei poipoi hoki i te hunga e eke ana ki ngā tūranga kaiārahi me ngā tūranga tumuaki i roto i ō rātou kura.
Ko te whakataukī “Mate atu he tētē kura, ara mai rā he tētē kura” te pou o te kaupapa nei.
E aro nui ana te wānanga ki te whakangungu i ngā ringa raupā e kawe nei i te taumaha o te mahi i roto i ngā kura. I reira te tohunga whakatere waka, a Hinerapa Rupuha, ki te tiri i ōna mātauranga. Ki tana kōrero, he rite te mahi hautū ki te hoe waka; he mahi tahi, he mahi kotahi. I kī ia, “Inā hoki kotahi ana tō tātou whakatere i te moana reo ora, o tikanga ora.”
I whakanuia hoki e Rupuha te hiranga o te taiao me te hononga o te Māori ki te ao tūroa hei oranga mō te wairua o te tamaiti.
Nā Julian Rolleston o Ngā Kura ā Iwi o Aotearoa i whakamārama te take i whakatūria ai te kaupapa. E ai ki a ia, ehara i te mahi māmā te tūranga tumuaki; he nui ngā wero me ngā taumahatanga e pā ana ki tēnei mahi.
Nō reira, he mea nui te manaaki, te whāngai, me te whakarato rauemi hei tautoko i a rātou i roto i ēnei mahi nunui.
I te mutunga o te rā, i hoki ngā kaiako ki ō rātou kura me te tūmanako me te māramatanga hou. He taumata hou tēnei mō te mātauranga Māori, e whakarite ana i ngā kaiārahi o āpōpō kia tū rangatira, kia tū māia, kia mau hoki ki ngā tikanga i tukuna iho e ngā tūpuna. Ko Te Pae Tōmina te tohu e ora ana te reo me ngā tikanga mō ngā whakatupuranga e heke mai nei.