I Te Wiki o Te Reo Māori ka tū Te Kapa o Ngāti Tarāwhai ki te Ahurei Tāpoi o Shanghai (Shanghai Tourism Festival) i tēnei wiki.
Kei kō atu i te rima tekau ngā kaihaka me ngā uri, mai i ngā rangatahi ki ngā kaumātua, i whai wāhi atu ki tēnei haerenga e whakapakari ana i ngā hononga ahurea ki te ao whānui, ōtirā ki Haina.
“Koinei te tino tō mai i tō tātou ahurea, i tō tātou reo hoki. I tēnei wā, e kainamu mai ana Te Wiki o Te Reo Māori. Nō reira, he horapa i ngā āhuatanga o tō tātou ahurea ki te ao,” hei tā te pouako o te kapa, a Ruakiri Fairhall.
“He rāngai mokopuna, he rāngai pakeke, he rāngai kaumātua hoki. Ko tēnei, ko te take i haere pēnei mai mātou, kia mārama ai ā mātou tamariki me kī ki ngā āheinga ki te wheakohia ngā mahi a te kaitakawaenga ā ao,” hei tā Ruakiri anō.
“E rongo hoki ai tātou te Māori i ngā huanga, ngā huatau a te Māori i a ia ka tohua ki ngā rangi, ki ngā whenua kē atu hoki.”
Tekau mā rua ngā tau o Raumahara King, e whakahīhī ana ia, i tana haerenga tuatahi ki tāwāhi ki te tū tahi me tana kapa ā iwi.
“Ko taku wā tuatahi ki Haina. Kei te tū ahau me taku kapa, a Ngāti Tarāwhai. He tino, tino, tino harikoa ahau,” hei tā Raumahara.
“He maha ō mātou tū, engari ko tēnei tō mātou mea tuatahi. Ahakoa ko tō mea tuatahi, kua rite mātou.”
I roto i tēnei haerenga tekau ngā rā, ka whakangahau te kapa ki ngā wāhi rongo nui pēnei i a Ocean Park me te pourewa teitei o Shanghai, e tū tahi ai ngā ahurea o te taniwha me te tarakona.