Ka whakanui ngā kōhanga reo o Taranaki ki te Raki i a Puanga mā te kaupapa ‘Kūini me ngā Kīngi’. He rā i kīia ai e te tokomaha he rā whakanui i te tau hou Māori, me te whakatairanga i ngā kākahu o ngā mokopuna.
Kua neke atu i te rua tekau tau te roa e tū ana tēnei kaupapa mō ngā mokopuna o taua takiwā. E ai ki te kaiwhakahaere, a Matapaepae Urwin, he mea nui te whakanui i te timatanga o te tau hou Māori.
“Neke atu i te rua tekau tau kua tū tēnei kaupapa mō tō tātau purapura o Taranaki ki te raki kia whakanui i tēnei wāhanga o te tau Matariki me Puanga hoki mō ngā mokopuna ko te timatanga o te tau hou Māori kia poroporoaki te tau kua hipa kia nau mai te tau kei te heke mai,” te kī a Urwin.
“Ko ngā kuini me ngā kīngi pēnei titiro ko te kaupapa mō ngā mokopuna me ngā mātua e hiahiatia ana, ka pai ko ngā kuini me ngā Kīngi,” hei tā Matapaepae anō.
I te rā nei, i koa ngā tamariki i a rātau e mau ana i ō rātau kākahu. I whakapuaki a Nellie-Robyn Rangi, tētahi o ngā tamariki, i tana harikoa, “He ataahua taku panekoti me he kuini”.
He rā harikoa mō ngā whānau anō hoki. I whakapuaki a Niki Chapman i tana harikoa ki te whai wāhi atu ki tēnei kaupapa. “He ātaahua harikoa katoa te tae mai ki te tautoko i tēnei kaupapa me te noho tahi ki taku pepi,” hei tā Chapman.
I whakapuaki hoki a Ngawai Kowhai i tana hiahia kia mahi tahi ngā kōhanga reo katoa. “I pirangi au ki te kitea nga kohanga reo katoa e takaro tahi ki te whakanui i a puanga ae just mahi tahi,” i kī ai ia.
Ko te moemoea a Matapaepae Urwin kia haere tonu tēnei kaupapa mō ngā tau e heke mai nei. “He māmā noaiho taku moemoea kia tū tēnei kaupapa ia tau, ia tau,” i kī ai ia.