Kua hoki anō mai ngā iwi o Taranaki, arā, o Te Kāhui Maunga, ki runga i te Pā o Ngā Ariki mō ngā whakanuinga o Rātana o tēnei tau, hei whakaū i te hononga e here ana i a rātou ki te iwi Mōrehu.
Ko tēnei whakaeke i kitea i runga i te marae ātea o Te Manuao, he haerenga i hangaia i runga i te whakapono me te manawanui.
“Tuatahitanga ko te Raukura kua eke nei ki runga ki te pā o ngā ariki ngā kōrero poropiti ka kōrerotia mō Te Whiti rāua ko Tohu o rāua tūmanakotanga i tō rāua wā, nā ka mate atu rāua ka ara ake te whetu mārama, ka ara ake Tahupōtiki Wiremu Ratana me ōnā poropititanga,” hei tā Wharehoki Wano o Te Ātiawa.
“Tumanakotanga mō ngā pehitanga o tōnā wā, ko te wā o te muru raupatu, te wā ia Te Whiti raua ko Tohu me te mōhiotia nei he nui tonu ngā uri o Taranaki Maunga ka aro ki ngā poropititanga o Ratana,” hei tā Wano anō.
“He whānaungatanga tuatahi ko te Kāhui Maunga tēnei, ko Taranaki Maunga tēnei ka heke nei ki runga ki te kaupapa me te rā nei ko te kawe ngā mate o te kainga katahi, ēngari mōhiotia nei ko te inoi o Ratana ki a rapua ngā iwi o te kainga tēnei mea ko te oranga o te kiko me te wairua.”
Ko te pōwhiri tuatahi a Ratana ki ngā iwi o te motu ka timata ki ngā iwi o Te Kāhui Maunga mai i Taranaki, ki te tira hoe waka o Whanganui. Ka mutu he tini ngā whānau pani ka kawe i ō rātou mate ki runga i te marae ātea o Manuao i tēnei tau.
“Nui tonu te hononga, ko Tahupōtiki Wiremu Ratana raua ko tāna wahine ia Urumanao i haere mai i a i roto i a Taranaki, ngā iwi katoa, ēngari ko ngā iwi matua me kī ko Ngāti Ruanui raua ko Ngaa Rauru Kiitahi,” e ai ki a Rauru Broughton o Ngā Rauru Kīitahi.
“Ko te rangatahi te mea nui, ki a pono te kōrero kāore a Ratana i pai ki tēnei rā huritau, te wahanga ki te huritau, ka mea i a kaua whakanuia i ahau ēngari whakanuia te ao wairua, ko te aronga nui o tēnei rā, o tēnei hui ki tāku mōhio ko ngā tamariki mokopuna koira te aronga nui,” hei tā Rauru anō.