Nō ngā wiki tata nei, i whakawhiwhia a Anaru Keogh (Ngāti Maniapoto, Ngāpuhi) i tōna tūranga, hei tohunga o Te Umu Pokapoka a Tūmatauenga mō Te Whare Tū Tauā o Aotearoa.
“He hōnore nui, nōku te whiwhi. E whakaaro nui a Papa Pita (Sharples) ki a au, whakaaro nui aku tuakana, ngā Taura Pou Whakarae ki ngā mahi i oti i a au i roto i ngā tau,” hei tā Keogh.
Kei kō atu i te 36 ngā tau a Keogh e hāpai ana i ngā rākau matarua a Tūmatauenga. Ko ia hoki te Taura Pou Whakarae o Te Whare Tū Tauā o Aotearoa ki Taiātea me tōna peka a Tūwaerea.
“I roto i ngā mahi whakangūngū, me whakapau kaha kia rongo. Ka pā te rākau ki a koe, me tīni ngā nekehanga ngā waewae. He nui ngā akoranga. Ko te wheako i tēnei ao Tū Tauā, ko te wheako te kaiako matua,” hei tā Keogh anō.
Ka tuku a Keogh i ōna mihi ki tōna whānau me ōna mokopuna, nā rātou anō i noho hei taituarā mōna.
“Me te mihi ki taku whānau. Ahakoa ko te Tū Tauā taku ao, ko taku whānau taku aho matua. I te wā i riro i a au te tūranga nei, i tino mihi au ki taku whānau, ki aku mokopuna nā te mea i ētahi taima, nā te nui o ngā hui, ngā te tini o ngā whakamātautau o ngā wānanga, ka noho ko te whānau te papa. Horekau e whai taima ki te mahi tahi me te whānau,” hei tā Keogh anō.