Kua tukuna te kaitono o Te Roopuu Reipa moo Hauraki-Waikato, e Kingi Kiriona i toona pooti ki te pouaka pooti i te toa hokomaha o Te Awa i Kirikiriroa inanahi.
Karahuihui ai ko toona whaanau me ngaa kaitautoko ki te toa hokomaha ki te tuku i aa raatou pooti i te waa kotahi. E ai ki a Kingi, he wheakotanga hou te haere ki te pooti me te kite i too ake ingoa i runga i te pepa.
“He wheakotanga hou, kaua te pōti engari ko te tuku pōti me te kite i taku ingoa i runga i te pepa. Nō reira, e rikarika ana, e harikoa ana, e ora katoa ana taku ngākau kei konei te whānau,” hei tā Kingi.
Hei tā Kingi anoo, e raangona ana i ngaa uauatanga o te waa kei ngaa hapori o Hauraki-Waikato, aa, ko te huri i te Kaawanatanga te tiiwhiri nui. Ko toona aaki nui kia puta ngaa kaipooti ki te tuku i aa raatou pooti.
“Ia waa ka tae atu taatou ki te hokomaha, e kite ana taatou i te nui o ngaa utu moo te kai. Ia marama, e whiwhi ai taatou i ngaa nama moo te hiko, e rongo ana taatou i te taumaha. Noo reira, eenoei momo aahuatanga katoa te tino take me kaua e moumou i too taatou mana ki te pooti. Noo reira, e puta ki te pooti i roto i ngaa wiki e rua kei mua i te aroaro,” hei taa Kingi anoo.
Hei te tuawhitu o Noema ko te Raa koowhiringa pooti, aa, kei a koutou te mana ki te tuku i aa koutou pooti.