E ono wiki noa iho e toe ana ki te rā kōwhiringa pōti, kua tū ngā kaitono mō te rohe pōti o Hauraki-Waikato, a Hana-Rāwhiti Maipi-Clarke o Te Pāti Māori rāua ko Kingi Kiriona o te rōpū Reipa, ki te paepae kōrero o Marae i runga i te pouaka whakaata a TVNZ.
Ko Hana-Rāwhiti te Mema Pāremata o te wā nei whai muri i tana wikitoriatanga i te tau 2023.
“He rawe te tae mai ki Marae i te ata nei, kōrero tahi i ngā taupēhitanga, i ngā nawe o tēnei Kāwanatanga, o te motu. Waihoki, te rohe,” hei tā Hana-Rawhiti anō.
“Kaua e pōti i a au i runga i te rautaki noa iho. Pōti because you believe in what I’ve been doing, because you believe an all indigenous party can still exist in the future of our Parliament,” hei tāna anō.
“Ko taku hiahia, ki te haere ki roto i ngā tōpito katoa o te rohe. Heoi anō, kua nui te wā e tae atu ki ngā tini kaupapa, ki ngā tini wāhanga. Waihoki, ko taku tino hiahia, kia rongo ai te iwi i ngā kaupapa here, i ngā mahi i waenganui, e ōrite ana ki te pāti Reipa, ki te pāti Kākāriki.”
I tēnei tautohetohe, i kōrero ngātahi ngā kaitono e rua ki te whakatakoto i ā rāua tirohanga me ā rāua tono ki ngā kaipōti. Ko te whakapono nui o te kaitono mō Reipa a Kingi Kiriona ka tāea e ia me tana rōpū te akiaki i ngā iwi o Hauraki-Waikato ki te hoki anō ki Reipa.
“He tino pai, i wātea māua ki te whakaputa i ō māua whakaaro mō te rohe nei, mō Hauraki-Waikato,” hei tā Kingi.
“Ko te mea nui ki a au, kāore au i te pīrangi haere ki te Whare Pāremata, kāore nei au te mōhio he aha ngā hiahia, he aha ngā anipā, he aha ngā tūmanako o te iwi whānui o te rohe o Hauraki-Waikato,” hei tāna anō.
“I whakatū ahau i taku ringaringa ki te kimi i te tautoko, i te whakaae a te iwi kia noho ko ahau hei māngai mō rātou. Kei te rongo au i ngā kōrero e rere ana, me noho pea au ki te taha. Inā pērā, ka wātea māua tahi ki te uru atu, engari, i te mutunga o te rā, me whakatakoto i ngā kōwhiringa katoa ki runga i te tēpū, hei whiriwhiritanga mā te iwi whānui.”