I raro i te ua tōtō tū i heke iho, i arahina e Te Arikinui Kuini Ngā wai hono i te pō te Kiingitanga me te ngā iwi o Tainui waka ki runga i a Mataatua Marae i Ruatāhuna, ki te tautoko, ki te tuku aroha hoki i te matenga o tō tātou pou tikanga rongonui o te ao Māori, o Tā Pou Temara.
Ko Nika Rua (Ngāi Tūhoe) e mea ana i roto i ngā whaikōrero i te wā o tana taenga mai i te marae, ko Tā Pou he tangata atawhai, he tangata aroha te rangatira kua ngaro i te pō nei.
“He tangata mutunga mai o te ngākau mahaki. E whakaaro nui ana ki āna tamariki ki āna uri katoa. Nō reira, ka noho i tana Urewera i te tangi maku kau ki tā mātou Pāpā ka riro,” hei tā Nika.
I te mea ko te ope tuatahi tēnei o te motu i eke atu ki te tangihanga, ko te taenga mai o te Kuini Māori i tohu i te kotahitanga me te pōuritanga nui e kawe ana e te motu katoa.
Ka whakahua a Nika, tētehi o ngā hāpai ō, he taumaha te ngākau i te matenga o tētehi pou tū ātea o te iwi, engari he mea nui te kite i te hui tahi mai o ngā iwi ki te whakahōhonu i te poroporoaki.



Ko Mamae Takerei (Ngāti Māhuta, Te Whakatōhea) i tae mai e whakakanohi ana a Tūrangawaewae marae.
“Kāore rātou i homai te taonga ki a koutu ki te noho kore noa iho nei. Ko te toimahatanga o te hari o te tāonga e kīia nei ko te wairua o te ao Māori e whoatu ki a koutu. Nō reira, Kua tae ki te wā, nā koutou te wā,” hei tā Mamae.
I tua atu i tōna mana ki te ao Māori whānui, i whai wāhi nui a Tā Pou Temara ki Te Whare Wānanga o Waikato hei pouako me tētahi rangatira mātauranga, i reira ia i whāngai ai i te reo, i ngā tikanga, me te hōhonutanga o te mātauranga Māori ki te mano tauira me ngā kairangahau.
Ko tēnei taenga mai i whakatinana anō i te mana nui o Tā Pou Temara, he tangata nāna i arahi te iwi me te tuku i tōna ora mō te ao Māori puta noa i te motu. Whai muri i te taenga mai o te Kiingitanga, i tae atu hoki ngā ope pēnei i tō Te Arawa waka, hei whakaū anō i ngā tikanga tuku iho me te tuku roimata mō tēnei rangatira nui.