Ka timata te Poukai nei i te tau 1956, aa, o taa teenei Poukai e whakanui ana i te huringa tau o Kiingi Korokii.
Kua whakatoopuungia ko ngaa ringa raupaa me ngaa ringawera o te marae ki te whakatutuki i ngaa mahi whakariterite.
“E rere pai ana ngaa mahi whakarite. Kei konei te whaanau e whakarite ana moo te Poukai whitu tekau o too maatou paa,” hei taa Williamina Tauroa o Ngaati Korokii Kahukura.
Ko ngaa mahi tuaki tuna me ngaa mahi piihore riiwai ngeetehi o ngaa mahi whakarite kai moo te Poukai nei.
“E hiiaka ana ahau ki te whaangai i ngaa puna tangata ka tae mai. Serving tea to the kaumaatua at our Poukai,” hei taa Tauroa anoo.
Ehakee i te mea, ko ngaa mahi whakarite kai noa iho te mahi moo te Poukai nei, engari ko te whakarite i ngaa rautaki tiaki taiao, peenei i ngaa mahi para kore teetehi o ngaa mahi kei te paearu moo ngaa mahi whakariterite.
“Me pono au, kei te minenga noa au e maatahi, e pakipaki ana. Araa kee ngaa toki kei te kaauta, ngaa haapai oo ki muri. Kaaore e kore ka tae mai ngaa amorangi ki mua hei te Raatapu, aa, ka miiharo ngaa mahi. Engari, kei muri muri rawa, pai tonu eeraa aahuatanga ipupara me te wawaahi i ngaa para,” hei taa Tamoko-o-te-rangi Ormsby.
Ahakoa te haaneanea o te haere o ngaa mahi whakariterite moo te Poukai nei, e hiikaka ana ngaa uri o Poohara Paa moo taa raatou.
“Kaaore i tua atu i teeraa, kia kite i ngaa tamariki, ngaa mokopuna e kawe ana i ngaa haepapa a raatou maa, hei hikuroa moo Te Arikinui i toona haerenga rua tekau, toru tekau, whaa tekau tau. Kei reira raatou,” hei taa Ormsby anoo.
Hei aapoopoo ka tuu te Poukai 70 o Poohara Paa.