Noo te ata nei i karahuihui ngaa maangai o te Kiingitanga, ngaa iwi o Kirikiriroa me te Koromatua ki ngaa maara o Kirikiriroa ki te whakarewa i te waa o Matariki ki roto tonu o Waikato. 

“I rawe, te taenga mai o te Kaahui Ariki, o te Tumuaki, o te Koromatua me ngaa iwi o Kirikiriroa e tahu ana te ahi. Ka mutu, he hokinga mahara, whakaaro ki a raatou kua mene ki te poo. I teenei waa kua titiro whakamua ki a taatou, ki te ira tangata,” hei taa Rahui Papa. 

Naa Papa anoo i aata whakamaarama i ngaa koorero moo Te Paki o Matariki. E ai ki a ia, maana e whakamaarama i ngaa koorero e ai ki a Tainui. 

“Ko Te Paki o Matariki tonu. Ko oona titiro whakamuri, ko oona titiro whakamua. Engari ko te aahuatanga o te tarere o Te Paki o Matariki e ai ki a Tainui koorero, e koorero nei i te aahuatanga o teenei kaahui whetuu. He mea whakakotahi i a taatou,” hei taa Papa anoo. 

I whai waahi te minenga ki ngaa mahi karakia me ngaa mahi owhaowha, aa, whai muri i ngaa mahi ookawa, he ngahau te mahi. 

“E whakangahau ana te peene rongonui a te Harmonic Resonators, anaa, me mihi ka tika ki te hunga naa raatou teeneki kaupapa i whakarite, araa, ko Te Ohu Whakaita, ki raro i te maru o te tiatangata, te heamana, araa, ko Marleina Ruka,” hei taa Maria Huata. 

He reo aumihi, he reo komihi taa Huata moo te hunga i whakarite i ngaa kaupapa Matariki ki Waikato. 

“Kei konei te tii me te taa e whakanui ana i te karanga tau hou o Matariki ki Waikato, ki ngaa maara nui o Kirikiriroa. Kua tae mai te koromatua a Tim Macindoe, kua tae mai te Kiingitanga, araa, ko te tuahine o Kiingi Tuheitia, ko Heeni. Kua tae mai te Tumuaki a Hone, kua tae mai hoki a Rahui, hei kanohi maa Waikato-Tainui. Waihoki, hei kanohi i too taatou Kuiini Maaori, Te Arikinui Nga wai hono i te po,” hei taa Huata anoo. 

“He nui tonu ngaa kaupapa. Ko te kotahitanga o ngaa iwi e noho nei i Kirikiriroa me te nui o raatou i puta i teenei haaora rorirori o te ata. Kaaore anoo i kookoo te tame heihei, kua puta mai ngaa iwi ki te whakanui i a Matariki,” hei taa Papa anoo. 

He neke atu i te 50 o ngaa kaupapa kua whakaritea e whakamaanawa i a Matariki ki ngaa rohe o Waikato me Waipaa, aa, kua tutuki te kaupapa tuatahi.