Ahakoa ngā hau o Tāwhirimātea e puupuhi mai ana, i te papa whutupooro o Patterson i Ngaaruawahia inanahi mo te tukinga whutupooro i waenga i a Raatana Maaramatanga me Ngaati Hauaa o Raungaiti moo te Hiira Koroneihana.
“E tika ana kia whakarangatira anō hoki te kaupapa o te rā, arā, he rangi whakamahara, he rā wairua mō Kīngi Tūheitia Pōtatau Te Wherowhero VII,” hei tā Kaiwhakaraki, Patara Berryman.
“E kiia nei ko te Koroneihana Shield, ana ko te whutupooro tērā, arā, ko te toa whakaihuwaka e rua tau ki muri, ko Rātana tērā. Ko rātou tēnā e pupuru i tērā o ngā taonga,” hei taana anoo. “Ana i toa whakaihuwaka a Ngāti Hauā, a Raungaiti i ngā whiringa whāiti.”
“E hīkaka ana te wairua o ngā tama. Kua roa rātou e whakaharatau ana ki te whakarite mō tēnei rangi,” hei tā te Poumua o Ngaati Hauaa, a Maraki Tuhakaraina.
“Kua tae mai mātou ki te hāpai i te kaupapa me te whakakanohi i te Tumuakitanga, otirā te tautoko tonu i ngā kaupapa o te Koroneihana,” hei taana anoo. “Ko te whāinga matua ko te wikitōria i tēnei rā. Heoi ko te pupuri tonu i ngā hononga i waenganui i te Tumuakitanga me ō mātou whānau o Rātana, otirā ki te hāpai tonu i te kaupapa.”
Ka toituu anoo a Paulie Manuel rātau ko tana kapa o Rātana Māramatanga. “Me pono taku kōrero, e rongo ana ahau i te hīnawanawa o te kiri nā runga i te mōhio kua roa nei tēnei kēmu e tatari ana. No reira, āe e hīkaka tonu ana i tēnei kaupapa,” hei taa Paulie anoo.
“E tika ana ka whakanui tātou i te rā wairua o te Kīngi. No reira, me mihi ka tika,” heo taana anoo. “Tuatahi, kei wareware mātou i te kaupapa. Tuarua, kawe atu i tā mātou nei kaupapa, anā ko te māramatanga o Ihoa tēnā. Tuarua, ko te kotahitanga. Tuatoru, ko te whutupooro.”
Ka mutu ko ngaa piro whakamutunga 14 ki a Raatana, 12 ki a Ngaati Hauaa Raungaiti, i riro maa Raatana te wikitoria i tēnei kēmu tata i teenei tau, aa, kua takatu raatou ki te whakahoki i te Hiira Koroneihana ki te Paa o Ngaa Ariki.
