Kua oti te tukanga mō te Rōpū Reipa ki te kopou i tana kaitono ka pakanga kia whakahokia te tūru Māori o Te Tai Tokerau ki a rātou i roto i te Kōwhiringa Pōti e haere ake nei.
“Kua roa ahau e tū kaha ana mō Te Tai Tokerau ahakoa i roto i te tūru auraki, i pātai mai ki ahau ngā mema o te Rōpū Reipa i roto i Te Tai Tokerau, ka tū ahau hei māngai mo Te Tai Tokerau mō te Rōpū Reipa,” hei tā Willow-Jean Prime.
“Nā te mea kua heke iho a Kelvin Davis i tēnei wā, nō reira he tūranga e wātea ana hei tā rātou ko ahau te mema tika kia tū,” hei tā Willow anō.
I tērā wiki ka tū ko te wānanga tuatahi mō te kāhui Māori o te Rōpū Reipa i Tāmaki Makaurau. E whakapono ana hoki te māngai Māori mō Te Rōpū Reipa kei a rātou te rautaki tika kia wini i ngā tūru Māori katoa.
“He wahine toa a Willow e tino mōhio ia tēnei kaupapa, te kaupapa tōrangapū, tino whakahihi mātou no te mea ko ia te wahine tino māia, tino pakari i roto i te whare, e whakatakoto ia te wero ki te minita i ngā wā katoa,” hei tā Willie Jackson.
“Tino whakahihi mātou te kite i tana mahi i te tau kua pahure, Ki ahau ko ia te wahine tika ki te tū i roto i Te Tai Tokerau,” hei tā Willie anō.
Tae mai ai ko te rōpū ki Rātana nei me ngā kaitorangapū o ngā rōpū katoa ki te whakanui i te hononga i waenganui i a rātou me te Hāhi.
“E whakapono ana mātou he reo kaha i roto i te Rōpū Reipa i roto i te Whare Pāremata, mō te iwi Māori mō ngā whānau Māori,” hei tā Willow anō.
“E mōhio ana mātou ki ngā kaupapa taumaha mo te iwi Māori i tēnei wā, arā, ko te iti o te pūtea mō ngā whānau te utu i ngā nama, te whiwhi i te mahi, te whiwhi i te whare,” hei tāna anō.
Atu i a Cushla Tangaere-Manual mō Ikaroa Rawhiti rāua ko Willow-Jean Prime mō Te Tai Tokerau kei te kōkiri tonu te Rōpū Reipa i tana tukanga kia kopou kia whiriwhiri rānei i ngā kaitono katoa ki ngā tūru Māori katoa. Hei te tautahi o Pepuere kati ai te wā ki ngā kaitono katoa mō te toenga o ngā tūru Māori.