Te Pikikōtuku o Ngāti Rongomai me Te Kapa Haka o Ngāti Whakaue: Ngā Toa Whakaihuwaka ngātahi o Te Arawa

E tautoko ana a Te Kapa Haka o Ngāti Whakaue i te whakatau a Te Tarahiti o Te Arawa Kapa Haka kia eke rātou ki te tūranga toa whakaihuwaka ngātahi, i te taha o Te Pikikōtuku o Ngāti Rongomai. I puta tēnei whakatau whakahirahira i muri mai i te tirohanga anō ki ngā pūnaha kaute o te whakataetae ā-rohe o Te Arawa.

E ai ki a Rangitihi Pene, te Heamana o Te Tarahiti o Te Arawa Kapa Haka, i hoki atu te kāhui kaute ki te āta tirotiro i ngā māka. Ahakoa kāore he hē i kitea ki te kaute o ngā māka tonu, i kōrero a Pene i hapa te pūnaha i whakatakotohia e te kōmiti. Ko te hapa i puta mai i tētahi ture whakahou, i tapirihia i tēnei tau tonu hei whakawehewehe i ngā tūranga.

“Āe, te rā i muri mai whakapā mai tētahi kōrero, i hē te whakahua ko Te Toa Ihuwaka o Te Arawa, ko Te Pikikōtuku o Ngāti Rongomai anake,” te kī a Rangitihi Pene.

I whakamāramahia e Pene te āhua o te ture ‘drop downs’, e taea ai te whakawehe i tētahi kapa i tētahi atu mēnā e ōrite ana ngā māka. Ka tirohia tuatahitia te māka mō te reo Māori, ā, ki te kore e rerekē, ka hoki ki te waiata-ā-ringa, ā, ka pērā tonu ki te mōteatea, te whakawātea, me te whaakeke. Nō te henga o te whakamahinga o tēnei ture i puta te whakatau hou.

E mōhio ana a Rangitihi Pene kei te mamae tuatahi a Te Pikikōtuku o Ngāti Rongomai nā te mea i whakapuakina rātou hei toa whakaihuwaka i te pō tonu, ā, kua tangohia ērā tūnga ināianei. 

Ahakoa tērā, i tukuna mai e Te Kapa Haka o Ngāti Whakaue tētahi pānui pāpāho e kī ana: “E tautoko ana mātou ko ō mātou koeke i te huarahi i takahia e te tarati. E kore hoki e motu te aroha ki ō mātou huānga o Te Pikikōtuku o Ngāti Rongomai.” I kī rātou, kāore rātou e hiahia ana ki te whakautu i ngā pātai ā-kāmera, engari ka tukuna mai tēnei pānui hei waha kōrero.

Nō Te Pikikōtuku o Ngāti Rongomai hoki te kī, “Ko te whakatau o te komiti te kupu whakatau. Ka mātua i tēnā.”

I te mutunga o te rā, i kī a Rangitihi Pene, “I te mutunga ake i wikitoria tahi ngā rōpū e rua.” Kua huri te kei o te waka, ā, e tū ana a Te Arawa ki te taka i ngā whakaritenga mō Te Matatini hei tērā tau.