Kua whakatakotoria te kākahu o te hōnore ki runga i a Tākuta Reuben Tuwhakahekeao Collier (Te Arawa, Ngāti Rereahu, Ngāti Maniapoto, Ngāti Porou) i te rā nei i te Whare Kāwana i Tāmaki Makaurau, i tana whiwhinga i te Tohu Hoa o Te Kāhui Tohu Hiranga o Aotearoa (CNZM) mō āna mahi ki te iwi Māori me te ao mātauranga.
“Mō ngā tau tata nei. Rua tekau, tekau mā whitu. Ka tau mai ko te hōnore a te Kuini, te MNZM, nā Kuini Irihapeti. Nō tēnei tau nei 2026, ka tau mai ko te hōnore a tana tamaiti a Kīngi Tiare. Hei aha? Hei tohu ki te tiikiti o te mana Māori,” hei tā Tākuta Reuben Tuwhakahekeao Collier.
“Kia mōhio tonu he tohu nui e aro atu ana ki ngā taonga nui o te iwi Māori. Ki te reo, ki ngā tikanga me ōna ritenga katoa, na kona, kua heke aku roimata kia Kui mā, kia Koro mā, nā rātou nei e whakaae ana,” hei tāna anō.
I te tau 2017 i whakawhiwhia ia ki te tohu Mema o Te Kāhui Tohu Hiranga o Aotearoa (MNZM) e te Kuini, ā, i tēnei tau i te Rārangi Whakahōnore o te Rā Whānau o te Kīngi 2026 i piki ia ki te tohu CNZM.
