Ko Tūhoto-Ariki Pene, te toa o Te Arawa, kua riro anō i a ia te taitara matamua mō te eke pahikara whakararo o Aotearoa i Ngongotahā, i Rotorua i te whakataetae eke pahikara ā-motu.
I tōna maunga ake o Ngongotahā, i te ara Kārearea, i wikitoria ia i te whiringa toa a ngā tāne, mā te 0.04 hēkona noa iho i a Oli Clark. He taitara karapīpiti tēnei mōna.
“I tērā tau i toa i a au i te whakataetae ā-motu, i tēnei tau, te tau tuarua kua toa au i tērā, nōreira ki te mahi i ngā tau e rua he tino harikoa te ngākau,” hei tā Tūhoto-Ariki Pene.
“He maha ngā kāre ā-roto i tēnei wā, tuatahi ko tōku whānau e āhei ana te haere mai ki te mātaki i a ahau, tuarua āe kei tōku haukāinga, kei runga i tōku maunga nei o Ngongotahā, he māmā mōku te haere mai ki kōnei – kua tau te mauri,” hei tā Tūhoto-Ariki anō.
Kāore i mutu i reira ana whakatutukitanga, i hoki mai ia me te tūranga tuatoru i te whakataetae Pump Track i Crankworx Rotorua 2026.
Credit: Cranxworx / Cycling NZ
“Inanahi mātou i reihi mātou i te whakataetae pump track, um i pai, i tae tuatoru ahau ki tērā whakataetae, engari ko tērā whakataetae tētahi he tākaro noaiho,” hei tāna anō.
E takatu ana a Tūhoto-Ariki ināianei mō te Ipu o te Ao ki Kōrea, hei takahanga tēnei ki te whai i tētahi taitara o te ao.
“Ōku whāinga i ngā wā katoa kia toa, engari kia hari koa tōku haere ki runga ēnei ara ki runga i ēnei maunga.”