Ka whakawhiwhia ki ngā raukura o Te Kura Kaupapa Māori o Ruamata i Te Tohu a Hinerēhia me Te Tohu a Tānerore i Te Hiranga o Te Ao Haka i roto i ngā Tohu Mātauranga 2025.
I te wiki nei pānuitia ai e te Mana Tohu Mātauranga o Aotearoa i te rārangi o ngā Toa Whakaihuwaka, e 38 rātou mō ia marau ki te marautanga o Aotearoa.
“Ko ahau pea te manukura tāne o tēnei o ngā kura, Te Kura Kaupapa Māori o Ruamata. He aha tēnei o ngā whiwhinga i tākoha ki ahau, arā, koirā ko te karapinetanga o te marau, Te Ao Haka mō te tau rua mano rua tekau maā rima,” hei tā Manawapohatu McGarvey-Borell.
“He maha tonu ngā wheakoranga. I te tiaki i te pinati i tēnei o ngā haerenga, tēnei o ngā ara o Te Ao Haka me te mōhio hoki ko wai ngā kaiwhakaaweawe, ngā kaiwhakaohooho o tēnei mea te kapa haka o roto i tō tātou nei ao,” hei tā Manawapohatu anō.
E hikaka ana te kaiako mō Te Ao Haka o Te Kura a Ramari Sherman kua eke āna tauira tokorua ki te taumata teitei o te marau hou nei.
“Me pono au, koinei taku tau tuatahi ki te whakaako i tēnei marau me te mea hoki, he marau hou ki tēnei taumata o te karahipi,” e ai ki a Ramari Sherman.
“Ko ngā momo rautaki i whāia, ko te āta rangahau, anā, ko te ruku ki ngā momo rauemi katoa. Pukapuka mai, ipurangi mai, tangata mai,” e ai anō ki a Ramari.
Ko te wawata nui mō Te Ahipukahu Edmonds, ā te wā, kia hoki ai ia ki tana kura hei kaiako haka mō ngā tamariki o te kura tautahi.
“Ko te mōteatea i titoa e au, he waiata tangi mō tōku koroua i hinga i te tau rua mano rua tekau ma iwa,” hei tā Te Ahipūkahu Edmonds.
“Mōku anō, he uaua māku te tuhi i ngā kupu. Engari anō hoki mō te rangi, he māmā noa iho.”