E tūmanako ana a Te Kapa Haka o Ngāti Whakaue kia mau tonu i te taitara Toa Whakaihuwaka mō te rohe o Te Arawa.
“Ko te ātaahuatanga o tēnei kapa, he kapa ā iwi, ā, kei te kite atu i te kotahitanga o ngā kaumātua, ngā kōeke i roto i a mātou, ākene pea koinei te super power o te kapa nei. Koira i tino kitea, koira i tino rangona i roto i te kapa nei,” he ai ki tētahi o ngā Kaiurungi, a Eugene Temara.
“I ahau ka puta i taku whare ka kite atu ahau i a Koro Ngongotahā e tū mai rā, ka rongo ki ngā waikarekare o Te Rotorua nui ā Kahu – koirā tonu ahau ka mōhio kei te mātotoru o Ngāti Whakaue,” hei tā Eugene anō. “Kāre e tū atu i tērā, te kite, te rongo, ā wairua, ā tīnana, ā hinengaro.”
Ko Anipatene Biddle, he uri anō nō Ngāti Whakaue, e tohe ana i te kaha o te kapa ki te whai i te tūranga tuatahi. Ahakoa te mōhio he pīkoko ngā kapa katoa ki te wikitōria, he whakapau kaha tā rātou ia mutunga wiki.
“Kei te mōhio mātou ko ngā kapa katoa e hiahia ana ki te tūranga tuatahi o te whakataetae, me pēhea e kore ai, engari ko tā mātou he whakapau kaha ia mutunga wiki kia ea ia mātou ngā whāinga ki te kawe i ngā kōrero o te iwi ki te ao ana arā te tumanako ka wikitoria i a mātou,” hei tā Anipatene. “Hīkaka ana i te mea kei te stadium o Rotorua nā reira kua hūnuku i a Paepae Hākumanu ki reira, kāore e kore ka rerekē engari e hīkaka ana ki te kite i ngā minenga.”
Mō Biddle, he kawe tōna tū i ngā whānau i tū ki te kapa i mua. “Taku tū ki tēnei kapa he mea kawe i aku whānau, te whānau Pango me te whānau Amohau mai rā anō mai i te tīmatanga o te kapa kua tū tētahi o taku whānau ki tēnei kapa. Nā reira ko tāku he kawe tonu i taua nohoanga o mātou,” te whakamārama a Biddle.
Kua roa te kapa nei e whanake ana, ā, kei te noho mātāmua i roto i ngā whakaaro o te tini me te mano. Ahakoa te pōuri mō te wehenga o ētahi kaihaka, e mōhio ana te kapa ahakoa te aha, ko te iwi kei ngā manawa, koirā te mea nui.