I te rā i mua tonu o te whakataetae kapa haka ā-rohe o Mātaatua 2026, i tau mai te rōpū toa, a Te Taumata o Apanui, ki Ruamatā ki te whakatutuki i tētahi herenga nui. 

Ko te kaupapa, he tuku i ngā taonga piupiu e 20 ki te rōpū hou o Te Arawa, ki a Te Whare Haka o Te Puku. E whakaatu ana tēnei mahi i te nui o te manaakitanga, me te whanaungatanga i waenga i ngā rōpū haka.

“Nō rātou wēnei taonga, heoi anō nō ngā pāharakeke katoa o te kāinga, ko ngā paru nō Maketū, ko ngā kānuka i waiwaihia nō te Raukokore, i horoia wēnei i roto i tō mātou awa o Raukokore,” hei tā Rob Ruha o Te Whare Pora o Te Taumata o Apanui. 

“Nā reira he taonga tēnei ka puritia te aroha o tētahi kapa ki tētahi, heoi anō ko te manako ia ka kaha tonu wēnei mahi o Te Whare Pora ki waenganui i a mātou, ōtirā ia, kia kite kei a whatu atu ngā tamariki koinei pea hei mahi mā rātou āpōpō,” hei tā Rob anō.   

“Koinei te Māoritanga, kaore he taima tēpara tō wērā mea me whakatutuki, nā reira koinā tētahi kaupapa nui, e hari nei te TOA, ao i te pō, kia tatu ko ngā kaupapa o te ao Māori ana koinei tētahi.”

I puta te kōrero nā te hiahia o Te Whare Haka o Te Puku kia whatua he huinga pūeru hou, i tono rātou ki a Rob rāua ko Cilla, me te whānau o Te Whare Pora o Te Taumata o Apanui, hei raranga i ngā piupiu. 

“I puta i a Kaaterama te whakaaro kia tono atu ki a Rob rāua ko Cilla mā rāua, ōtirā mā rātou te whānau o Te Taumata o Apanui te wāhi ki ngā piupiu e whatu ana, i kaha tautoko mai rātou i te tono,” hei tā Te Rau o Te Huia Pou o Te Whare Haka o Te Puku.

“Te āhua o mātou pūeru, ko te hiahia kia korowaitia mātou ki ngā tohu o Te Aho Matua, nā reira i pīkauria e rātou tērā haipapa, nā, e mihi nui ana ki te whānau,” hei tā Te Rau o Te Huia anō. 

He tauira tēnei tuku i te kaha o ngā kapa haka ki te tautoko i a rātou anō, me te whakanui i ngā uaratanga Māori i tua atu o ngā hua o te atamira.

Hei te 5:20pm, ā te Rā Horoi, te 14 o ngā rā o Maehe, ka tū ko Te Whare Haka o Te Puku me ō rātou taonga piupiu hou ngā Te Whare Pora o Te Taumata o Apanui ki te atamira Whakataetae Kapa Haka ā-Rohe o Te Arawa 2026.