Kei te kaha haere ngā mahi whakatikatika a Te Kapa Haka o Tūtarakauika ki Rangataua mō te whakataetae ā-rohe o Mātaatua. E tautoko ana a Aukaha Kakau rāua ko Teraania Ormsby i ngā rangatahi kia tū pakari, kia tū ora i runga i te atamira, ā, i te ao hurihuri anō hoki.
“Mātou i āhua tupu i tēnei kapa ehara i te mea i whirinaki noa ki o mātou ake mātua, engari i mātua rautia mātou e ngā tini kaihaka o tēnei kapa… i te mea, te kaupapa o Tūtara Kauika te wā i whakaarahia ake e tō mātou pāpā, he whare wānanga, e waru ngā kawekawe o te wheke o Tūtarakauika Kapa Haka nei, kaupapa nei, ko te kapa haka tērā, te whare tū tauā tērā ko te whaikōrero, ko te karanga, ko te raranga, ko te whakatere waka me tō mātou pāpā a Jack me te huhua noa atu o ngā kaupapa tuitui i ērā kaupapa katoa,” hei tā Aukaha Kakau.
Nō reira, ehara noa te kapa haka i te haka, engari he tūāpapa ako, he tūāpapa ora mō te katoa e ai ki a Teraania Ormsby.
“Ko au te kuia o te kapa i ēnei rā nātemea kua nui ngā tau i roto i a mātou he reanga whakapaparanga o te whānau o Tūtarakauika. Nō reira ko te wahanga nui ki a au i roto i ēnei rā, ko te āta tiaki i te hunga rangatahi,” hei tāna.
“He kapa tupu marae, engari kei te taone nui Pākehā ake nei o Tauranga moana nō reira he uaua i ētahi taima kia āta whakamāorihia ētahi o ngā nekehanga i roto i tēnei horopaki o te taone nei… Ka āta manaakitia ngā tamariki ki ngā tikanga o te marae engari ko ngā tikanga a tētahi ki tētahi, te manaaki, te tiaki i te taiao kapa haka, te manaaki, te tiaki i ngā whakaaro he pēhea tō putanga atu ki te ao pae papori hei tauira.”
Ka mutu, hei te 1255pm ā tēnei Rā Horo28 o ngā rā o Pepuere tū ai tēnei kapa o Tauranga Moana ki te atamira whakataetae.