E kite mārika ana i te hīkaka o ngā tamariki o Te Kura Kaupapa Māori o Tōku Māpihi Maurea i a rātou e whakarite ana mō ngā reihi Waka Kōpapa.
“He pai te haramai, te mātakitaki, anā, kua kite ake kua nui ake, kua rahi ake ngā tīma i tēnei tau,” hei tā Whaea Missy o Te Kura Kaupapa Māori o Tōku Māpihi Maurea.
Nō ngā rangi tata nei i tū ngā whakataetae waka kōpapa ki Tūrangawaewaewae marae, ā, kua rahi ake te nama o ngā tīma i tēnei tau. He neke atu i te 104 ngā tīma nō ngā pito o te rohe o Waikato i whai wāhi ki ngā reihi 57 o te whakataetae nei.
“Kei te tino hīkaka ahau nō te mea koinei te rā whakataetae. Āe tika ana te kōrero, kua roa e haramai ana ki te whakarite, parakitihi hoki. He mea nui me te mōhio hoki he kaupapa tino nui kei waenganui i a Tainui nē,” hei tā Whaea Missy anō.
I tae tuarua te kapa nei i roto i te rauna o te whiringa taumātaki, ā, i eke rātou ki te rauna kia kite ai ko wai ngā tīma ka eke ki ngā whiringa whāiti.
“I tae tuarua mātou o Tōku Māpihi. Āe, i te tino hihiko, i tino pai tērā ki ahau. Koirā tō mātou reihi tuatahi, arā, ko ōku hoa tau whitu tā rātou hoe tuatahi. He tau whitu/waru, ā, he maha rawa ngā tamariki he nui rawa i a rātou,” hei tā Kingi-Tukaki o Te Kura Kaupapa Māori o Tōku Māpihi Maurea.
Ehakē i te mea ko te whakataetae te mea nui mō ngā tamariki nei, engari ko te whakawhanaungatanga me te kotahitanga kē.
“Mēnā ka hoe kotahi mātou, e rima katoa ngā tāngata, mēnā ka hoe kotahi, ka kotahi tētahi hoe pai rawa atu,” hei tā Kingi-Tukaki anō.