Kua whakakotahi ngā whaturoa Māori ki Te Whare Wānanga o Waikato mō te wānanga whakaahua tuatahi, arā, ko Te Huinga Whaturoa, nā Te Kāhui Whaturoa i whakatū.
Ko te whāinga nui o te wānanga nei, he whāngai i ngā whaturoa ki ngā pūkenga o te hopu i ngā whakaahua e whakarangatira ana i ngā kaupapa nō te ao Māori.
“Kua roa tēnei whakaaro e hurihuri haere ana i waenganui i a mātou, māua ko Erica, a Karetai, a Hemi. Kātahi ka tau mai te pana a Karetai, me kōkiri tātou. Nō reira, ka tū te kaupapa,” hei tā Te Rawhitiroa Bosch, Mātanga Kaiwhakaahuao Te Kāhui Whaturoa.
“Ko Erica Sinclair rāua ko Abe Mora i aro ki te taha whakaahua me tēnei mea te whakairo i te māramatanga. Anā, ko au i kawe i te kaupapa o te whaturoa i roto i te ao Māori, he whaturoa mō te ao Māori,” hei tāna anō.
He tata ki te rima tekau ngā kaiwhakaahua ka rēhita ki te tūhono i Te Huinga Whaturoa nei i ngā rangi okioki kua pahure ake nei.
“Nā ngā kaiako katoa i whāngai mai, anō hoki kua tūwhera ake te ngākau i ngā whakaaro, kua kī te kete mātauranga i ngā whakautu me ngã wheako nui e tāea ana i roto i ēnei mahi,” hei tā Kolby.
“Ko te whāinga pae tawhiti, ko te tū hei kaiwhakaahua, hei whaturoa ki ngā kaupapa e ngākaunui nei e au. Ko te hākinakina Māori, ko ngā kaupapa Māori pēnei i ngā manu kōrero, pēnei hoki ki ngā whakataetae kapa haka. Āe, koira aku tino whāinga nui.”
Nō reira, kua mutu pai ngā mahi o Te Huinga Whaturoa. Ko te mahi ināianei mā ngā whaturoa, kia whakaū i ngā akoranga hou i roto i ā rātou mahi whakaahua haere ake nei.