Naa Te Arikinui Kuini Nga wai hono i te po, ngaa mokopuna a Inia Te Wiata me te iwi i whakatau i Te Pou Ihi.
E ai ki a Te Whainoa Te Wiata, he mokopuna naa Inia Te Wiata, he moemoeaa kee te hokinga mai o te pou ihi nei ki toona uukaipoo.
“Kua roa nei maatou te whaanau e tatari ki tana whakahokinga mai kia whakahoungia. Me te mea raa, moo te waa roa, ko te aahuatanga i tana hokinga mai, he moemoeaa kee,” hei taa Whainoa Te Wiata.
He nui ngaa mahi kei mua i te aroaro hei whakahou i te pou whakairo nei, peeraa ki ngaa waahanga i whati, tae atu ki ngaa tauihu me ngaa taurapa.
“Te nui hoki o ngaa waawahi kua puta mai. Teetehi o ngaa tauihu kua pakaru. I te waa i whakamoe i te pou, kaaore ngaa tangata i paku whakarongo. I wawaahi teetehi o ngaa… i whati teetehi o ngaa taurapa. He taurapa, he tauihu ki runga, ki runga ake. Koina te mea i whati, whati pai,” hei taa Te Wiata anoo.
I whakapuaki hoki a Rahui Papa i te koanga o toona ngaakau moo te hokinga mai o te taonga nei me te hononga roa a Inia Te Wiata ki a Te Puea Heerangi me te Kiingitanga.
“He rawe ki a au. Noo mai anoo ko te hononga a Inia Te Wiata ki Te Puea maa i runga o Tuurangawaewae Marae. Ka mutu, ka noho hei tauira moo Piri Poutapu maa i te ao whakairo, ka riro ki roto o Ingarangi. Koinei te hua, ko Te Pou Ihi kua hoki mai i roto i ngaa aahuatanga o te whakatikatika,” hei taa Rahui Papa.
I tae mai Te Arikinui Kuini Nga wai hono i te po ki te poowhiri i Te Pou Ihi. E ai ki a Papa, he mea nui te taenga mai a Te Arikinui, ngaa mokouna me ngaa uri whakaheke o Inia Te Wiata.
“E ora ana te ngaakau i te aahuatanga o te huihui mai o ngaa mokopuna a Inia Te Wiata ki te whakakaupapa i teenei tuu aahuatanga, otiraa i runga i te whakaaro nui o Te Arikinui kia tae mai ki teenei o ngaa kaupapa nui oo roto o Waikato,” hei taa Papa anoo.
Ka oti ngaa mahi whakatikatika hei te tau 2027, ka hoki atu a Te Pou Ihi ki Raanana.
