Kua whakataua a Te Kanawa Wilson, he tauira noo Te Wharekura o Ngaa Taiaatea i Kirikiriroa, hei Toa Whakaihuwaka mō ngā marau e rua o Te Reo Maaori me Te Reo Rangatira i roto i Ngaa Tohu Maatauranga a te Mana Tohu Maatauranga o Aotearoa (NZQA) mō te tau 2025.
“I te waa i kite ai e au. Ahua ohorere engari i tino harikoa,” hei taa Te Kanawa Wilson.
“I roto i ngaa karaehe, ko Whaea Maioha Ohia teeraa i taunaki mai e au, aa, ka tono hoki au ki a Matua Greg Koia. Naana au i haapai i roto i eenei mahi anoo hoki. Naa reiraa, i eke rawa ai i teera taumata,” hei taano anoo.
Ko Te Kanawa tētahi o ngā Toa Whakaihuwaka o ngaa marau 38 o te motu ka whakawhiwhia ki teenei hoonore nui.
I tana paapaa, i a Che Wilson, ka poho kereruu ia ki te ekenga o tana tama ki te taumata tiketike o te ao maatauranga.
“Mi’aro katoa. Mi’aro atu ki ana ma’i nui i te roanga ake o te tau kua ‘ipa atu nei, oti no, tana w’ai ake i toona ake ara,” hei taa Che Wilson.
“Kia kaua e no’o pouaka. Koiraa te mea matua i te mea teenei ao Maaori ka ka’a no’o pouaka. Noo reira ko taa maaua akiaki i a raaua, otiraa ngaa tamariki kia kaua e no’o pouaka, engari kimi’ia te ao,” hei taana anō.
Hei tohu o tana whakatutukitanga, ka riro i a Te Kanawa teetahi karahipi tata ki te $3,000 mō te whare wānanga. Ko ia tētahi o ngā raukura Kura Kaupapa Māori tokotoru i toa i ngā karahipi i tēnei tau, e whakaatu ana i te hiranga o ngā Kura Kaupapa Māori ki te ao mātauranga.
“Ko taaku noa ki te hunga e hiakai ana eke ki te taumata. Ekea rawatia!” hei taa Te Kanawa anoo.
