He moko kauae hei oranga: Ko Tangihia Tumai-Te Pou, e anga whakamua ana i te kotahi tau i muri i te rironga o tōna pāpā

Ko te Moko-Kauae kua tū hei puna whakarauora mō te whānau Tumai-Te Pou e rongoā ana i te mamae o te ngākau i te kotahi tau i muri i te matenga ohorere o tō rātou pāpā.

Ko Tangihia Tumai-Te Pou, 17 ngā tau, kua whakatau ki te tā i tōna kauae, hei tohu i te maumaharatanga hōhonu, i te rongoā, me te tīmatanga hou, hei aranga mai tēnei i te pōuriuri ki te ao mārama.

Ko Tangihia tonu te kaiwhiwhi i tēnei rā. Nō Waikato, nō Tūhoe, ā, nō Te Moutere o Aitutaki anō hoki ia. Kua tae mai ia ki Moko 101 i tēnei rā hei whiwhi i tana moko kauae hei tohu aroha ki tōna pāpā.

E 41 noa iho ngā pakeke o Vernon Te Pou i tana matenga. E ai ki a Tangihia, “Ko Vernon tōku pāpā, 41 ana pakeke, ko aku maharatanga ki a ia, he tangata arohanui ki te waiata, ahakoa papatahi mai, ahakoa rōreka mai”.

He kotahi tau ki muri rā, i mate ohorere a Vernon Te Pou, he pāpā ki a Tangihia, he hoa pūmau ki a Wairuaiti Tumai. E kī ana a Wairuaiti Tumai, i hīkoi haere tana kōhine ki tōna taha, ki ngā poukai, ki ngā hui, ki ngā hui mate. I te poukai o Wāhi, i tuku te pātai atu ki a ia, mehemea e hiahia ana ki te whiwhi i tōna moko kauae, ā, “i tērā rā i whakaae”.

I kī a Wairuaiti Tumai, te pouaru, “Ahakoa te mamae, he rongoā mā mātou ko aku tamariki”. I whiwhi rātou katoa i ētahi moko ki ngā momo wāhi katoa o te tinana i te wiki whai muri i te matenga o tō rātou pāpā, hei maumahara i a ia.

I te wā e wero ana ki te uhi, ka kohara mai ko te rongomau, e mauri tau ai tēnei pāharakeke, kua kotahi tau e pani nei. Ka mihi nui a Tangihia ki tōna whānau, “Mihi nui ki taku whānau kua tae mai, arohanui ki taku whānau kua tae mai hei tautoko i tēnei haerenga hou mōku, āe, arohanui”.

I tēnei rā, hei whakakapinga mō tēnei tau taumaha mā rātou. I kī anō a Wairuaiti, “I tēnei rā pea, hei whakakapinga mō tēnei tau taumaha mā mātou, tē taea te karo, ka mamae tonu, mō ake tonu atu, mō taku hoa rangatira, e mokemoke ana au mōna”.

Ko ia e tūpore nei, i a tūporerangi, i a tūporenuku e tau nei – he wā e whakaaroaro ana ki te mate o te tangata aroha, i a ia e anga whakamua ana ki te tīmatanga hou.