Hei whakanui i Te Wiki o Te Reo Māori, kua whakaritea a Māori ki Waikato i tētehi pō tautohetohe. Ko te kaupapa kōrero, Mā te rangatahi te motu, te ao e whakahaere.
Kei te taha whakaae o te tautohe nei, ko ngā pakeke, ā, mā ngā rangatahi e whakahē i te kaupapa kōrero o te tautohe nei.
“I rawe. He rawe te hoki mai ki taku Whare Wānanga i Te Wiki o Te Reo Māori. Ko te koanga ngākau i te tīmatanga nē,” hei tā te kaitono mō te tūru o Hauraki-Waikato mō Reipa, a Kingi Kiriona.
Kua wāhi te kaitono mō te tūru o Hauraki-Waikato, a Kingi Kiriona ki te hoki mai ki tōna Whare Wānanga mō te tautohe nei. Hei tāna, e poho kererū ana e ia ki ngā mahi i tutuki i taua pō.
“Ko te kaha o te tū, engari ko te pakeke o te whakaaro me te rangatira o te tuku i te whakaaro. Nō reira, āe e whakahīhī ana taku ngākau i ngā mahi i tēnei pō,” hei tā Kiriona anō.
“E weriweri ana. Heoi anō, ka ora, ka ora i roto i te ngahau, ka ora ki roto i te kaupapa o te pō nei me te mea kē, ko ngā hoariri, he hoa tata,” hei tā Te Atamihi Papa.
Mā ngā rangatahi o Te Whare Wānanga o Waikato e tohe i tō rātou whakahē i te kaupapa kōrero nei. Hei tā Te Atamihi Papa, ko te reo ōpaki me te reo pārekareka ngētehi momo reo e whakakatakata, e whakangahau hoki i te marea.
“Ko te ngahau. Ko te manako ia, ka pukukata te kaimātakitaki, ka pukukata ngā hoariri, ka pukukata hoki ngā kaiwhakawā. Me te mea kē, e whakaae ana ngā kaiwhakawā ki ngētehi taonga,” hei tā Papa anō.
Kei te pae rangatahi hoki a Manawapohatu McGarvey-Borell e whakahē i te kaupapa kōrero o te tautohe nei. Nāna i whakakapi i te taha o te pae rangatahi.
“Ko te take i whakaae ki tēnei tono, he pai pea mō taku CV. Heoi anō, ko te kite hoki i ngā hua, te kite hoki i te rerekētanga o ngā taumata o te reo. Ahakoa, ka whakawhiu mātou e ngā pakeke, kāore e kore he akoranga ō roto,” hei tā Manawapohatu McGarvey-Borell.
Hei tā McGarvey-Borell, mēnā ka hākoakoa te marea, kua tutuki tōna whāinga mō te tautohe nei.
“Kia hākoakoa te ngākau, kia whakangahau i te marea. Āe, koirā noa iho,” hei tā McGarvey-Borell anō.
“E rua, e rua nā te mea ko ā mātou tamariki ēnei. Nā reira, e rua ngā whakaaro, tētehi kei te noho hei pāpā ki ēnei tamariki, kua tono hei hoariri. Nā reira, kāore au i te mōhio me pēhea e taea ana te whai i tētahi ara e kore ai tētahi e pāpōuri, e pā mamae rānei i tētahi,” hei tā te Pouhere o Kanapu, a Poia Rewi.
Hei tā Rewi, me tika te whiu o te reo i roto i ngā mahi tautohetohe, kei pā manawa tētehi.
“Kia taea tonu te wero i runga i te mea hoki koira ngā mea e mātau ana ki te kōrero Māori,” hei tā Rewi anō.
Ahakoa i toa ngā pakeke i te tautohetohe nei, i ū tonu ngā pakeke me ngā rangatahi ki te kōrero Māori, hei tauira mā te hunga kōrero Māori ki Te Whare Wānanga o Waikato.