Ka tū te rōpū ngahau o Te Aroha o Tūmanako, tētehi o ngā kapa 23 i te Whakataetae Kapa Haka o Tāmaki Makaurau i ngā rangi okioki, ā, he kapa ka karanga atu ki ngā raukura o Te Kura Kaupapa Māori o Hoani Waititi Marae kia tū kotahi.
Ko te whāinga matua o te rōpū, ka aratakina e Metotagivale Schmitt-Peke, he whakapakari i te oranga ngākau me te waiora o te hapori mā roto i te ao haka ōtirā ki te tautoko i te ao kapa haka, te rohe me ngā rangatahi. “Ahakoa te poto o te wā, ki ahau nei kua kounga ngā mahi. Well kua kounga te ngana o te kapa. Koirā pea te mea nui. Me te ataahua te noho tahi o te tuakana me te teina,” hei tā Schmitt-Peke. “Ko Te Aho Matua te tāhuhu o tō mātou whare. Ko ngā poupou, ko ngā tikanga, ko te reo Māori. He whakamana ia i tō mātou ahurea,” hei tāna anō.
Ka hoki anō te Mema Pāremata mō Tāmaki Makaurau a Oriini Kaipara o Te Pāti Māori ki te whatarangi, ehara ia i te tauhou ki te ao kapa haka. “Ko te ataahua o te ao haka e mōhio nei tāua he oranga ngākau. He pikinga waiora, he whanaungatanga he kotahitanga. Koinei te take he whakapiki te ora o te hapori katoa mā te whakatoopu i a mātou,” hei tā Kaipara. “Kaore au i tino haratau engari mā roto i te akonga o tōna mānuka te tautōwhito Kaihaka ne? He huna i ngā hapa. Koirā tāku!
Ahakoa kotahi rā noa iho te whakaharatau, i tū te kaihaka a Tahuri Tumoana ki te tautoko i ngā rangatahi me ngā tamariki i tipu ki raro i te maru o Hoani Waititi Marae. “Nō reirā, kei hea he kaupapa e tū atu mai i te Kapa haka ki te whakakotahi ai, ki te whakaora i a tātou ā-wairua, ā-tinana. Kia tū ehara ki te whakahīhī, engari kia tū mauri tau,” hei tā Tumoana. “Kia tū kotahi rātou me ā rātou tamariki. Ānei ka haramai nei, ka tū ā tōna wā ki te kapa a Puawai mō Hoani Waititi. Nō reirā nā Papa Pita tēnei whakaaro me ō rātou pea o tēnei marae,” hei tāna anō.
Hei whakamutunga, e rima ngā kapa ka whakakanohi i a Tāmaki Makaurau ki Te Matatini ka tū ki Hopuhopu ā tērā tau. Ka tuarua ko te kapa Whakataetae o Te Aroha o Tūmanako arā ko Ngā Tūmanako.