He tata ki te 300 ngā kaiwhirihwhiri kua tau ki Tūrangawaewae marae mō te hui tuatahi Whakarewa 2026. Ko te pūtake o tēnei hōtaka, kia whai wāhi ngā rangatira ā iwi, ngā tari kāwanatanga me ngā kaimahi ki te tūhonohono, ki te wānanga hoki i ngā hononga hei whakapakari i te hunga e mahi ana ki te rāngai nei, hei tautoko hoki i ngā wawata o ngā whānau.
“E tika ana kua haramai tēnei rōpū ki Tūrangawaewae ki te whakawhānui me kī ā rātou nei akoranga, ā rātou nei wheako e pā ana ki ngā mahi ki ō tātou nei whānau,” hei tā Nanaia Mahuta.
Nā Nanaia Mahuta te hōtaka i whakatuwhera mā āna kōrero mō ngā hononga me ngā whakapapa e tautoko ana i a Whānau Ora me te whakamahara hoki i te rā wairua o Te Puea Hērangi.
“Ka tika rā me mihi atu rā ki te kuia o te marae nei, ki a Te Puea, tēnei tōna rangi. Ka whakanuia tērā tū āhuatanga o tana mahi i te ora, tatū atu rā ki tōna mutunga ki runga i te marae o Mangatangi,” hei tā Mahuta anō.
Mā tēnei huihuinga e whakanui i te hiranga o te whanaungatanga i waenganui i ngā kaimahi me ngā hapori. E ai ki a Mane Tahere o Te Rangitāmiro, he rohe nui tēnei e toro atu ana mai i Te Tai Tokerau ki Tūwharetoa, ā, he rohe e kawe ana i ngā wero pēnei i te rawa kore me te noho kāinga kore.
“Āe, he rohe nui tēnei, rohe tahi mai i Te Tai Tokerau tae noa ki Tūwharetoa. Nō reira, te maha, he rohe nohonga o te maha o te iwi Māori. He maha ngā take, te rawa kore, kāinga kore, ēnei ngā tū āhuatanga o te rohe nama tahi o Te Rangitāmiro,” hei tā Mane Tahere.
Ko te tino whāinga o te hui, he āki i ngā kaiwhiriwhiri ki te tiaki i a rātou anō i a rātou e hāpai ana i te ora o ō rātou whānau me ō rātou hapori.
“Ko te whanaungatanga kei waenganui i ngā kaimahi kei ngā hapori rātou e mahi i ngā mahi,” hei tā Tahere anō.