Kua riro i a Te Pikikōtuku o Ngāti Rongomai te taitara toa whakaihuwaka o Te Arawa Kapa Haka mō te tau 2026. He wikitōria i whakatapua e rātou ki ā rātou tamariki, whānau, kōeke, me te iwi whānui. Nā te kaha me te pai o te tū, i tutuki ai te hiahia o te rōpū ki te eke panuku, ā, kei te titiro whakamua rātou ki Te Matatini 2027.
“Tangi ana te ngākau i tēnei whakawhiwhinga, i tēnei wikitōria, i tēnei whakaihuwakatanga nō runga i te whakatau o tēnei tau, ā, kia mātua whakapono ki te hoatu i ngā hua ki ō mātou tamariki rangatahi,” hei tā Tukiterangi Curtis, kaiārahi o te kapa.
“I te wā ka haere ki te mātakitaki i te hunga kaimātakitaki kaore ōku tirotiro kāore ōku pōrearea, i te mea ko wēnei tamariki ko ngā kaihaka o taku rōpū i tupu mai i taku taha mai i te wā rātou i te rima pākeke,” e ai anō ki a Tukiterangi.
“He whānau koinā te kaupapa Matua o te kapa, he whānau, he iwi nōreira ka mātua ko ērā mea e rua, ko te Kapa haka ka noho tuatoru ki ērā kaupapa engari ko te Kapa haka ka te mea ka honohono ia mātou whai huarahi a Ngāti Rongomai ki a rātou anō,” hei tā Renata Curtis, Manukura Wahine o te kapa.
“Kua tutuki, ā, ko te wero nui o te kapa i tēnei tau i te mea i tiro kia tuatahi te tū ehara i te mea he tauhou mātou ki tērā momo,” e ai anō ki a Renata.
Ko te Kaiwhakawā Matua o Te Arawa Kapa Haka, a Turuhira Hare, i kōrero mō te uaua o te whakataetae: “Koinei pea te whakataetae uaua katoa o te motu atu i a Mātaatua nōreira ehara i te mea karekau ngā Kapa kāore i te uru, ehara i te pai, kaore rātou i pai, ko te kaupapa nui noaiho i puta. Tokoono noaiho rātou ka haere ki Te Matatini koirā noaiho te rerekētanga.”
Ka mōhio anō a ia mō te pakari me te kaha o Te Pikikōtuku o Ngāti Rongomai: “Ōtirā i puta te Kura huna o ngā Kapa katoa, hāunga a Ngāti Ronomai he tau rātou he tau koinā noaiho te kōrero,” hei tā Turuhira anō.
Hei tūāpapa mō tō rātou haerenga ki Te Matatini, ka whāia e Te Pikikōtuku o Ngāti Rongomai te huarahi o te whakapapa.
“Ko te whakapapa tētehi huarahi e whāia ai e mātou koirā tō mātou hononga ki reira, ki tō tātou Arikinui a Nga wai hono i te po, ōtirā ki Te Whare Ariki o Potatau Te Wherowhero waimarie mātou i whai wāhi a Ngāti Rongomai a Ngāti Pikiao ki roto o tērā whakapaparanga ana koirā te timatanga ka kapohia ngā kōrero ki reira hei tūāpapa mā mātou e haere atu ana ki Te Matatini,” hei tā Tukiterangi Curtis anō.
Ka tū Te Matatini 2027 ki Hopuhopu i Waikato mai i te 22 ki te 27 o ngā rā o Pepuere.